Tuesday, October 6, 2009

حواديت من وحي أكتوبر


كان عندي احساس غريب اني هرجع اكتب تاني في اليوم ده
في ذكري الانتصار
في ذكري الايام الحلوة
واللي المفروض يكون بعدها اجمل واجمل لكن دلوقتي شايفين العكس تماما

ما علينااا مش هنتكلم بكآبة ومش هنضيع فرحة علي الاقل علي ذكري جميلة في نفوسنا كلنا

حبيت ارجع وأأرخ لاحساس معين حسيته في وقت من الاوقات

زمان وأنا صغيرة كانت ذكري انتصار أكتوبر بالنسبة لي فرحة بس فرحة عادية
واستني فيلم الطريق الي ايلات والرصاصة لا تزال في جيبي والعمر لحظة
والافلام الكتير دي اللي كان التلفزيون بيتحفنا بيها

لكن بجد اول مرة احس فيها فعلا بنشوة الانتصار زي ما بيقولوا
في اليوم ده
وقتها كان عندي 12 سنة

كنا في منتصف شهر سبتمبر تقريبااا وكان عندي تسجيل في الاذاعة
كالعادة كنت بقضي اجازة الصيف في التمثيل في برامج الاطفال
في اليوم ده كان عندي تسجيل برنامج صندوق الدنيا
خلصت تقريبا ع الساعة واحدة
وفوجئت انا والولد زميلي اللي كمل معايا لنهاية التسجيل ان ابلة سهير المخرجة عايزانا ضروووري عشان نسجل تيتر مسلسل جديد عن ذكري انتصار أكتوبر اسمه(حواديت من وحي أكتوبر) وطبعا كان لازم نلبي الطلب
بالمناسبة الولد زميلي ده يبقي (محمد محمود) اللي كان بيعمل مسلسل بكار

المهم
قعدنا مع ابلة سهير نعمل بروفاا ع التيتر
كانت كلمات المقدمة بتقول

لما نقول أكتوبر
نسمع كلمة نصر
ولما بيجي النصر
نردد كلمة مصر

وكلمات النهاية بتقول

يابكرة انت اجمل
يا بكرة ملكش مثيل
كلنا احفاد أكتوبر
وحواديتنا معناها جميل

سجلنا التيتر والحمد لله طلع جميل
وكان موعدنا الاسبوع اللي جاي عشان نسجل حلقات المسلسل
لسوء حظي اني جالي دور برد شنيييييع قبل ال
تسجيل بيوم
ومقدرتش اسجل مع زمايلي حلقات المسلسل

ولما عرفت ميعاد اذاعته في الراديو بقيت استناه واسمعه
وفي حلقة يوم 5 أكتوبر
كانوا جايبين مشاعر الناس في اليوم ده
وقد ايه الناس كانت بتتمني انها تتخلص من الكابوس ده
ونفسهم يحاربوا وياخدوا بتارهم من اسرائيل
والحلقة قفلت علي الجملة دي

الناس كانت مستنية بفارغ الصبر!!1

بعد ما سمعت الحلقة
حسيت انه كان فيه بجد معاناة
وان الانتصار والنجاح بعد الفشل بجد له طعم حلو اووووووووووي
وان انتصارنا في اليوم ده كان حاجة كبيرة اوي
والعالم كله اتكلم عنه
انتبهت بعدها الي ان 6 أكتوبر ده يوم عظيم اوي في حياة كل مصري
وبعدها في كل سنة
احس الاحساس الجميل ده

بس للأسف دلوقتي بقيت اتنبه لحاجات
مش حلوة
ولذة الانتصار راحت زهوتها من عندي
انتصار 73 كان ممكن يبقي اجمل واجمل
لو مكانش كل اللي بيحصلنا ده حصل

زي ما قلت في الاول مش عايزة اكئب الناس
يمكن احس النهاردة بلذة الانتصار من تاني


كل سنة وانتي طيبة يا مصر

22 comments:

الازهرى said...

الأول بلا منازع

الازهرى said...

وكمان التانى والتالت
الخ الخ الخ

نروح نشوف الحواديت بقى

adel said...

موضوع حلو

لاننا للاسف متعودناش نحس بطعم الانتصار

احنا علمونا ان 6 اكتوبر
كوبري
اجازة
نشاهد فيها مجموعة من الاغاني و الافلام اللي تفهة الانتصار
الطريق الي اخر فيصل
وعلي رأي د/ستيتة
الرصاصة لا تزال في اتلبادي الاستومك

الازهرى said...

أنا بقى حسيتها بدرى كتير عن كده
لان عندنا فى بلدنا ناس حاربت هناك وكنت احب اقعد لما يبتدوا يحكوا عن المعارك واللحرب والذل والعزة والفرق الكبير بين مشاعرهم بعد سبعه وستين وبعد تلاته وسبعين

بجد من شكل وجوههم وقت الحكايه تعرفى كل الحكايه

مسدس صغير said...

كل سنة وانتى طيبة
ذكريات جميلة
نتمنى لمصر من نصر الى نصر على كافة الاصعدة
احييكى على البوست يا بتاعة برامج الاطفال انتى
ههههههههه

romansy said...

كل سنه وانتى طيبه
يا سفروته
اجمل حاجه لما نكون بنحب حاجه بنحسها وتخاف علينا قوى
مصر بنحبها كلنا
بس اوقات نتمنى انها تكون احسن كتير كتير

ذكريات اكتوباريه
فى المملكه السفروتيه

لنحيا فى اجواء الحب said...

ايه ياسفروته

انتى فين

وحشتينا جدا جدا جدا جدا

موضوع اكتوبر موضوع فعلا جميل بنستنى نعيشه دايما

دمتى رائعة يااجمل سفروتة

مصرى دائما

سفروتة said...

ازهررررررررري
...............
كيفك يا والدي
والله بجد افتقدت مناكفتي معاك ورفعي لضغطك وسكرك
هههههههههههههههههههههههههههه
بالمناسبة انا قلت لايمي تروح تصرفلك المعاش
مش عارفة بقي وصل ولا لأ
:P

يا بختك بجد انك حسيت الفرحة دي بدري
والفرحة اللي علي حق فعلا
مش تصوير الافلام والمسلسلات

دمت بخير سيد ازهري
:)

سفروتة said...

عااااااااادل
..............
كيفك يا راجل؟؟

الطريق الي اخر فيصل
هههههههههههههههههههههههه
لا حلوة بجد

والله وحشتني تعبيراتك الفظيعة في الكومينتات

احنا افتقدنا التأريخ للحرب
صحيح الاعلام كل سنة بيتكلم وبيعمل وبيقول
بس اليوم ده مش عايزين فيه افلام ولا اغاني
محتاجين افلام وثائقية تتكلم من واقع المصادر المتعلقة بالحرب فعلاااااا
وهي دي اللي هتحسسنا بالانتصار بجد

سفروتة said...

مسدس صغير
..........
منور يا مسدس بيه

وانت طيب يا فندم
يعني مسمعتش عيارين كده من مسدساتك يوم 6اكتوبر؟؟
كانوا نايمين ولا ايه؟؟
:D


نتمنى لمصر من نصر الى نصر على كافة الاصعدة
ــــــــــــــــــــــ
هههههههههههههههه
دي امنية بجد
ولا بحق وحقيقي؟؟

سفروتة said...

romansy
..........
اهلا بعاشق الرومانسية
وانت طيب يافندم

عندك حق
احنا بنحب مصر قوي
ونتمني ليها انها تكون احسن من كده

ههههههههههههههههه حلو قوي الاسم ده
ممكن استعيره؟؟

نورت يا عمدة

سفروتة said...

لنحيا في اجواء الحب
....................
محمد المصري دائماااااا
كيفك؟؟
ها أنا قد عدت من جديد

نفسي ارجع احس اكتوبر زي زمان

دمت بخير
:)

mohamed ghalia said...

يابكرة انت اجمل
يا بكرة ملكش مثيل
كلنا احفاد أكتوبر
وحواديتنا معناها جميل

لسه عندى أمل

زى الهوا said...

بوست عسل ياسفروتتى


إلا قوليلى صحيح __ انتى ما بتكبريش ولا ايه؟؟

كل مره الاقي فى الانفورماشن بتاعتك انك 19 سنه

صغنتوته اووووووووووووووى

طوبه فضه وطوبه دهب said...

ازيك ياقمر عامله ايه يارب تكونى فى احسن حال واتم صحه

الشجرة الأم said...

الإنتصار في حد ذاته غاية لا تدركها إلا الشعوب التي ذاقت مرارة الهزيمة

ومع أجمل ذكرى وأجمل انتصار خالد في قلوب الأمة الإسلامية العربية

قلم رصاص said...

السلام عليكم

بالفعل احنا عملنا انتصار تاريخي ونصر عسكري كبير جدا لم يتحقق لنا قبل ذلك واعتقد لن نستطيع تجديده في الفترات القادمة نظرا لظروفنا واوضاعنا الحالية

ورغم هذا النصر الذي الا اننا لم نؤرخ له كما يجب ان يكون.. واعتقد ان ده تقصير راجع ليس فقط للدولة المصرية وانما يرجع ايضا الينا كشعب محب لبلاده .. فليس من الضروري ان تقوم الاجهزة الرسمية او التابعة للحكومة بانجاز كل الاشياء

احيي حضرتك على البوست والتذكرة الرائعة بنصر اكتوبر

دمتم في حفظ الله

سفروتة said...

mohamed ghalia
.................
كلنا عندنا امل

سفروتة said...

زي الهوااااا
................
هههههههههههههههههه
لا مش بكبر
انا بصغرررررررر
دايما صحابي يقولولي الناس بتتخن وانتي بتخسي
:D
ثفروتة بقي

سفروتة said...

طوبة فضة وطوبة دهب
...................
الحمد لله انا بخير يا دهب
بس الصحة عدمانة شوية
بسبب الكلية
يارب اخرج منها سليمة

سفروتة said...

الشجرة الام
.............
كلامك صح
بس انا نفسي ارجع احس باليوم ده تاني
زي ما كنت بحسه زمان

سفروتة said...

قليم رصاص
...........
طبعاااا انا معاك في كل كلمة قلتها
وفي نقطة انت اشرت اليها وهي انه مش كل حاجة ع الدولة
ودي كانت في تعليق ازهري
انه من خلال حكايات الناس اللي تعايشت مع الحرب اتكونت جواه لذة الانتصار وفرحته
بس مش كل الناس دلوقتي عندهم اللي هيحكولهم ويفكروهم
فانا كان قصدي انه بدل الافلام الممثلة دي
يكون فيه افلام وثائقية هتبقي بين عيون الناس كلها وهتتحكي من واقع الناس اللي شافت الحرب والمرار والازمة
ده غير الوثائق والكتب اللي ممكن تبقي متوفرة في اي مكتبة
التأريخ مهم جداااااا للمرحلة دي بجد


اشكر حضرتك ع التعليق
والزيارة الاولي
واتمني انها متكونش الاخيرة
دمت بخير