Wednesday, June 17, 2009

من الارض الي مملكتي


:) شوهد السيد رومنسي وهو آت من بعيييييد متجها نحو باب المملكة فاستوقفه حارس سفروتي بس جباااااااااار


الحارس : علي فين ان شاء الله..معاك تصريح يا افندي؟؟

رومنسي : لأ .. بس انا جاي وجايب هدية لمليكتكم العظيمة ..كلام في سرك انا جايب ليها تااااااج

الحارس : (وقد شهق شهقة عظيمة ادت الي تراجع رومنسي الي الوراء قليلا) بتقووووول ايه؟؟ ...تااااااااج... ده انت يومك مش معدي ونهارك مش فايت ..انت عايز الملكة تخلع التاج بتاعها وتلبس التاج بتاعكم؟

......رومنسي : لأ حضرتك فهمتني غلط ..ده مش تاج بيتلبس .. ده

الحارس : (وقد قاطعه) بس ولا كلمة اقف عندك لحد ما ارجعلك


وبعد ما وقف رومنسي شويتين حلوين في الشمس خلته يندم انه جه هنا اصلا


سمحوله بالدخول


رومنسي : سفروت الخير ياجلالة الملكة
سفرفر : سفروت النور يارومنسي .. انا بجد متشكرة ليكم اوي ..وبلغ تحياتي لكل شعب الارض وقولهم منتحرمش من تاجاتكم..واسفة انك وقفت كل ده في الشمس ( وش مكسوف) لكن فجأة بقي ( وش شرير ذو لهجة شريرة) بس يكون في علمك من هنا ورايح مفيش اعاااااااااااااااانات ... هات يا استاذ التاج اما نشوف فيه ايه



اسمك؟

سفروتة الشهيرة بــ نوران


سنـــك؟

تسعة عشر عاااااااااااااااما


مجال دراستك؟

الطب البيطري


اسم مدونتك؟

حــــبـــــة صـــــمـــــت

وعندها اخت بس مسافرة اسمها سكــــــوب

صورتك الرمزية في المدونة بتعبر عن ايه؟
الانيمي
والانيمي يعني كارتون...والكارتون يعني انيمي
ههههههههههههههههههههههه
خلاص خلاص
اقصد يعني من الاخر
اني طفلة
وبحب اعيش دور الطفولة اوي
ده حتي لسة امبارح واحنا خارجين من الامتحان كان معايا مصاصة
اه والله
:)

هل فكرت في اغلاق مدونتك؟ والسبب؟


اه فكرت مرة واحدة فقط


لاني كنت وصلت لمرحلة من اليأس اللحظي (حلوة الكلمة دي) ونفس السبب اللي خلاني افكر في كده هو اللي خلاني اتراجع عن الفكرة دي




ايه رد فعلك لو حد قل ادبه عليك في المدونة؟


النوعية دي من الناس بيبقوا ماشيين علي وتر الاستفزاز ..واحسن طريقة هي التجاهل ومسح التعليق وعدم اعطاء اي اهمية لناس زي دي




اسوأ مدونة دخلتها؟


شفت انا مدونات وحشة كذا مرة بس مش فاكراهم لاني كنت بخرج منها علطول




هيحصل ايه للايميل بعد ما تموت؟


هيمووووووووووت


عطيت الباسوورد لحد قبل كده؟

اه زمااااااان اديت لواحدة صاحبتي الباسوورد عشان تشوف الايميل لان النت كان فاصل عندي وقتها بس انا غيرتها دلوقتي

السفر بالنسبة لك؟


كنت بسافر وانا صغيرة فمش فاكرة ممكن كنت بحس وقتها بأيه


بس ممكن نقول بدل السفر ركوبك للميني باص يعني ايه؟؟


ههههههههههههههههههههههههههههههه


اولا لما بمشي فوق كوبري ويكون ع النيل وبالليل كمان بيبقي المنظر تحفففففففففففففففة وبحس ان النيل بيكلمني وانا بكلمه


لا مش مجنونة


ده صمتي الرائع






المود بتاعك ايه؟


متقلب لابعد درجة ممكن حد يتخيلها


وان كان كل الناس بيشوفوني مبسوطة وبضحك وبيتهموني باللسعان بس ده ظاهريا فقط وبيكون فيه حرب من المشاعر المختلطة بتدور جوايا




بتعمل ايه في وقت فراغك؟


القراءة .. النت ..او بطبق الغسيل




الاكلة المفضلة؟


البطاطس المحمرة




الصفات التي اخذتها عن والدك؟


عشقي للغة العربية والقراءة




الصفات التي اخذتها عن والدتك؟


العقاب في صمت


الامانة


والكتمان




اكتر ست حاجات بتحبهم؟


مش لازم ستة يعني




وقت الفجر والسما لسة هتبتدي تنور


النيل


الراااديو


اي حاجة تخص الجينات والهندسة الوراثية






اكتر ست حاجات بتكرههم؟


قلنا مش لازم ستة




النفااااااااااااااق ..عشان بجد حاساه اوي اليوومين دول من ناس كتير حواليا


العتاب بدون اي سبب


نظااااااام كليتنا المتخلف


التطفل




شخصيتك نوعها ايه؟


غامضة




لماذا دخلت عالم التدوين من الاساس؟


كانت صدفة بحتة ...بس حقيقي اجمل صدفة


واثرت فيا كتير




احلي جملة قيلت في وصف مدونتك؟


الصمت في حرم الجمال جمال




اهمية التعليقات بالنسبة لك؟


طبعا بيهمني رأي اللي عدي من هنا في اللي كتبته


ورأيهم ايه ونصيحتهم ليا هتكون ايه


وكمان بطمني علي احلي جيران واجمل اخوات انهم بخير وكويسين




احلي بوست كتبته؟وضع اللينك ثم اذكر السبب


لأ دي صعبة شوية


ممكن تبقوا انتوا تجاوبوا عليها وتقولوا ايه البوست اللي عجبكم




افضل مدونة قرأتها؟


ودي كمان صعبة


مش عشان خايفة حد يزعل ولا حاجة


لأ


لان كل واحد وله فكره الخاص اللي بيعبر عنه ومينفعش اقول ان ده حلو وده وحش


كل واحد بيعبر بطريقته




الشغل بالنسبة لك؟


ههههههههههههههههههههههههههه


انا لسة مشتغلتش وان كنت بحاول اني اعمل اي مشروع دلوقتي بس العملية نحس جداااااااااااااا




الانترنت بالنسبة لك؟


ادماني المحبب


اي حاجة احب استفسر عنها بجري عليه






تمرر التاج ده لمين؟


متهيألي المدونيين شبعوا من التاج ده


صح ولا ايه؟؟


ههههههههههههههههههههههههههههه


لا بجد اللي يحب يتفضله اهلا وسهلا وهيشيل معاه الاعانات اللي كنت ببعتها لشعوب الارض مع رومنسي


:)






ـــــــــــــــــــــــــــــــــــــــــــــ


وحشتوني كتير علي فكرة وخلاص بقي اخدنا افراااااااااااااااااااااااااااج وخلصنا امتحاانات امباااااااااااارح


الحمد لله








31 comments:

EMMY BABY said...

اول كومنت لسفرفر
اللى بجد بيعجبنى جدا اسلوبها فى الكتابة
فعلا الدخلة عجبتنى جدا جداااااااا وخاصة انك شخطى فى رومنسى ووقفتيه فى الشمس

مستغربتش من اجابتك خالص بس استغربت انك قلتى غامضة انتى صامتة مش غامضة ده رايى يعنى

وبجد بجد عجبنى جدا اجابتك وحسيت التاج خلص بسرعة سبحان الله

اممممممممممممممممممممممممممواة يابنيتى

تحياتى

مامتك

Swing said...
This comment has been removed by the author.
زى الهوا said...

مبروك الاجازززززة

اجابتك عسووووووووووولة , واسلوبك اعسل

Eno said...

الاول وقبل اي كلالالالام بوسه كبيره اووووووووووووي

ثانيا وحشتيني اوووووووووي

ثالثا ايه ده هو الغسيل ده ورايا ورايا
ههههههههههههههههههههههههه

التاج جميل اوي واجاباتك كمان جميله اووووووووووووي ربنا يكرمك يانور :)

تحياتي

mohamed ghalia said...

أنا كمان خلصت إمتحانات النهاردة
يلا عقبال النتيجة

romansy said...

رومنسى يطلب الدخول تانى الى المملكه

romansy said...

انا وقفت فى الشمس وكمان شخطتى فيا وهتلغى الاعانات
لالالالالالالالالالالا
انا اكتشفت ان الحارس دا كداب ووصلك الكلام غلط دا قالى لو عندك تاجات تانى وخلصنا من ملكيتنا هات كل اللى عندك
وتعالى ابقى انتالملك سفروت
قولته لا
انا عمرى ما هسيب مملكتى وامسك اللملكه دى

romansy said...

بس الصراحه بقى صعب عليا الحارس
والصراحه اللى خلانى اسامح ان التاج جميل وزى العسل تاج سفروتى صحيح

romansy said...

بس الصراحه بقى صعب عليا الحارس
والصراحه اللى خلانى اسامح ان التاج جميل وزى العسل تاج سفروتى صحيح

عمرو وجيه said...

مبروك الاجازة


مع انها مش اجازة كاملة

التدريب مبهدل الدنيا بصراحة


عودا أحمد يا سفروتة


و ان شاء الله تكون أجازة سعيدة و مفيدة

Mo7ammed said...

ايه العسل ده ياخواتى

لأ لايق عليكى الانمى فعلا

ههههههه

جميلة اجاباتك عالتاج ياسفروتة
وعقبال تيجان كتييييييييير


مع السلامة

Rooma Qandil said...

اخيرااا يا بنت,,,,

فعلا اسلوب البوست في اوله بجد جاامد وغريب
حلووة اووي اجاباتك وخاصة كتير منها زي مثلا ردك على التعليق


هههههه
والميني باص بالنسبة ليكي ايه
جاامدة يا نوري

عودا احمدا يا بونية

Rooma Qandil said...

بنت يا سفروتة ابعتيلي ايملك على الايميل ده عشان اضيفك في مدونة للدفعة بتاعتنا
republic.vet@hotmail.com

منتظرة ...يلاا انتي لسه متحركتيش

enjy said...

دمك خفيف على فكرة وشكلها مش اخر مرة ليا هنا

smilyrose said...

سفروتى يا حبيبتى وحشانى جدا

ةمعلش على الغيبة بس غصب عنى

يعلم الله كم تعب قلبى من فراقكم

اجاباتك جميلة جدا يا صغيرتى

ويارب تكونى من المتفوقين يارب

على فكرة انا بحب البطاطس جداااااااااا

ههههههههههههههه

اختك

وردشان

روح الحب الصادق

سفروتة said...

EMMY BABY
...........
يا اهلا يا اهلا
بماماتي
منورة والله
ميرسي ربنا يخليكي علي كلامك اللي بيشجعني ده
طبعا مش مامتي ولا زم تشجعني
:D

هههههههههههههههههههههههههههههههه
رومنسي مستحلفلك علي فكرة
وناوي يرد رد قاسي
بس علي غفلة
هههههههههههههههههه

ما هو يا ايمي عشان انتي عارفاني كويس عارفة اني صامتة
لكن لمعظم الناس الصمت ده بيكون غموض
لغير المقربين
فهمتي يا عثل؟

اموووووووووووووووووووووواة ليكي يا مامتي

ثلام
:)

سفروتة said...

زي الهوا
..........
مووووووووووووووووحا
وحشتيني والله
الله يبارك فيكي ولو انها مش هتبقي اجازة خالص
في نيلة زفت تدريب
بعيد عنك

انتي اللي عســــــــــــــل

:)

سفروتة said...

Eno
..........
وانا كمان وقبل اي كلام ليكي بوووووووووووسة كبيييييييييييييييرة
يا اينووووووووووووووو
يا ثكر انتي

وانتي كمان وحشتيني جدااااااااااااااااااااااااااااااااااااااا

هههههههههههههههههههههههههه
اه يا فندم الغسيل وراكي وراكي
مش هيعتقك

انتي اجمل يا اينو
ربنا يخليكي يارب

:)

سفروتة said...

mohamed ghalia
................
اهلا يا محمد
منور والله
يارب ان شاء الله النتيجة تكون كويسة

سفروتة said...

romansy
...........
اهلااااااااااااااااااااااااااااااااااااااااااااااااااا
اه اتفضل يا استاذ
ما الحراس عرفوك خلاص
ما انت بقيت مننا وعلينا
ومش بعيد تصاب بعدوي السفرتة
ههههههههههههههههههههههههههههههههههههههه
وتصبح سفروت
ههههههههههههههههههههههههههه


علي فكرة بقي حراسي عمرهم ما كدبوا عليا انت بس مش عايز الناس تعرف انك وقفت في الشمس والحراس زعقوا فيك
بس بس بس مهما قلت من مبررات محش هيصدقك
:D

ميرسي كتير يا رومنسي والله
واكثر الله من تاجاتك
ودايما منور
:)

سفروتة said...

عمرو وجيه
............
اهلا اهلا
منور يا عمرو

فعلا زي ما قلت مش اجازة خااااااااااااااااالص

خير ان شاء الله

:)

سفروتة said...

Mo7ammed
..........
ههههههههههههههههههههههههههههه
طلعت طفلة صح؟
هههههههههههههههههههههههههههههه
منور المدونة يا محمد
وان شاء الله تكرر الزيارات
:)

سفروتة said...

Rooma Qandil
..............
اخيرااا يا رووما

ربنا يخليكي يارب
ميرسي كتير علي كلامك الحلو ده

عودا احمد لينا كلنا شباب بيطري

منورة يا ثكر
:)

سفروتة said...

enjy
........
ربنا يخليكي يارب يا انوج
وان شاء الله تيجي هنا دايما
وتنوريني

تحياتي يا قمر

سفروتة said...

smilyrose
..........
يا اهلا يا اهلا
بوردة التدوين
منورة المدونة يا روز

انتي كمان بتحبي البطاطس؟؟؟
ههههههههههههههههههههههههههههههه
بصرة

ربنا ما يحرمني من زياراتك الحلوة دي يا روز

دمتي بود
:)

طوبة ذهب وطوبة فضة said...

تسلم ايديك ياجميله تحفه البوست وحمد لله على السلامه ويارب تكونى بالف خير وطمنينا عملتى ايه فى المهمه الصعبه اللى اسمها الامتحانات يارب يكون خير

blue-wave said...

تاج واجابات مفيش احلى من كدا
بجد وحشتنى المدونه وصاحبتها
ومبروك انك خلصتى امتحانات
تحياتى

سفروتة said...

طوبة فضة وطوبة دهب
......................
وحشتيني يا دهب
ربنا يخليكي يارب
والله يا بنتي الكلية عدمانا العافية
ولسة بقي الزفت التدريب اللي ملوش لازمة ده
بجد حاجة تخنننننننننننننننق

نورتي يا قمر
:)

سفروتة said...

blue-wave
...........
اهلا اهلا يا دوك
منور المدونة
الله يبارك فيك
ادعيلنا بقي ربنا يكرمنا في النتيجة

دمت بخير
:)

حلم بيعافر said...

كويس ان رومنسى ربنا كرمه والارس سابه يدخل

ابو المفاصل الواصل said...

الشماعة
وبعدين فى الطــــــبع الغريـــب يا جماعة
كل واحد لغـــــلطة مفصــــل لـه شـماعة
يعلق عليها عيوبه ونفــــــسة الملتـــــاعة
ويدارى الخـــــيبة بدل مواجهتها بشجاعة
وهو فاكر عمل اللى عليه فى نفس الساعة
ولكنه زيه زى اللى بيحــــرق نفسه بولاعة
بعد فترة هيحس مدى التقصير والبشــــاعة
فى حق نفسه المغيبه وكأنه فى بلاعــــــة
ولا يبقى له غير الندم والعطش والمجاعة
=============
ناجح يوسف فهمى