Thursday, January 29, 2009

احلي الاوقات

تحديث يا بني ادمين 14-2-2009
بعد اما نشفوا ريقنا
النتيجة ظهرت وجبت جيد جدا الحمد لله

والله ما مصدقة

لا بجد حاسة اني بحلم

طب حد يخبطني في دماغي بأي حاجة اسفنجية كده عشان افووووووووووووق

مش مصدقة اللي انا فيه بجد

خلـــــــــــــــــــــــــــــــــــــــــــــــــصت امتحانات

هههههههههههههههههههههههههههههههههههههههههههههههههههههههههههههه

معلش الضحكة طويلة شوية

بس فعلا ده احساس اي حد متقوقع وسط الكتب من اول الدراسة ومهري امتحانات من اول سكشن

يااااااااااااااااااااااااااااااااااااااااااااااااااه

الحرية حلوة يا اولاد

نيجي لموضوع البوست بقي

...................................


احلي الاوقات


علي قد ما فيه حاجات كتير مؤلمة علي قد ما في حاجات كتير مفرحة

يعني مثلا

بضحك فعلا من قلبي


لما نكون انا وعيال سكشني واقفين قدام لجنة الشفوي ومنتظرين المصير المحتوم ... في الوقت ده بيطلع مننا كلام عجيب بجد... كل كلامنا بيبقي متوظف علي مصطلحات المادة اللي بنمتحنها .. فمبنقدرش نمسك روحنا من الضحك وطبعا جنابي بتكون الضحية


ـــــــــــــــــــــــــــــــــــــــــــــ


كمان من احلي اوقاتي لما اقفش في البت ايمي بيبي او هي تقفش فيا مش فارقة ... بنتكلم كلام بحس انه اكبر مننا او بتاع ناس خبرة في الحياة .. بتعرف تفهمني كويس جداااااااااا .. وبتطلع مني الكلمة اللي ممكن محدش يعرفها لو انا مقلتهاش ... بجد يا بنت يا ايمان انتي متعرفيش مكانتك عندي ايه..وغلاوتك عندي قد ايه... يارب نفضل صحاب طول العمر ومتفرقناش حاجة ابداااااااا


ــــــــــــــــــــــــــــــــــــــــــــ


لما نكون في الشتا واروح من الكلية بالليل واقعد في العربية جنب الشباك وفجأة المطرة تمطر .... يااااااااااااااااااه بجد احساس فظيع وانا شايفة قطرات المطر وهي نازلة ع الشباك ... معرفش بحس بدفء بالرغم من ان الدنيا بتكون تلج.... سبحان الله


ـــــــــــــــــــــــــــــــــــــــــــــ


لما عمي يجي عندنا او احنا نروح نزورهم وبعد الغدا والشاي اجيب عمو وبابا ونقعد احنا التلاتة واخليهم يلعبوا لعبة الشعر .. كل واحد يقول بيت شعر والتاني يرد عليه ببيت تاني يكون بيبتدي باخر حرف انتهي بيه البيت الاولاني .... بجد بموت علي نفسي من الضحك لما اللعبة تدخل في مرحلة الاصعب والاصعب والاقي واحد منهم يألف بيت شعر في النص عشان يهرب من المطب اللي هو فيه

هههههههههههههههههههههههههههههههههههههههههههههههههههههههههههه

بجد ببقي مستمتعة جدااااااااااااااااااااا


ـــــــــــــــــــــــــــــــــــــــــــــ

يمكن دول بجد اكتر الحاجات اللي بتخليني اضحك او افرح


ربنا يديم عليكم انتم كمان السعادة


ـــــــــــــــــــــــــــــــــــــــــــــــــــــــــــــــــــــــــــــــ


بعتذر عن عدم تواجدي حاليا وهبقي متاحة لعالم التدوين من اول يوم التلات الجاي

انا بس قلت الحق اخطف كلمتين اقولهم واسلم عليكم

وان شاء الله هزوركم اول لما ارجع


هتوحشوني

:)