Tuesday, December 8, 2009

امتي الناس هتقولي كفارة !!!!


وفي رواية أخري : بيطري تعذيب وإصلاخ


مفيش حد عاقل في الكون ده بيمتحن كل اسبوع امتحانين وتلاتة
من اول السنة واحنا متنيلين علي عنينا بنمتحن
ده مش ميد تيرم
ده الترم كله امتحانات
وهنختمه بأربع امتحانات الاسبوع الجاي
وبعد كده العملي هيبتدي علطول

فعلاااااااااااااااااااااااااااااااا
كلية طب الحيوان بجامعة المعز لدين الله الفاطمي تفوقت علي معتقل جوانتانامو

:(

مفيش علي لساني غير سيرة الكلية الكلية..الكلية الكلية.... معنديش اي دراية باللي بيحصل خارج المجال البيطري وده اكبر خطأ ..للأسف

ادعولنا يا جماعة

Wednesday, December 2, 2009

:)



لو سرقت منا الايام

قلباً معطاءاً بسّام




لن نستسلم للآلام

(انا رجعت تاني ..الحمد لله)

Thursday, October 22, 2009

في السريع


في السريع
شعاري الفترة الحالية
وده لان كليتنا الغراء علمتنا اننا نعمل كل حاجة بسرعة بداية من الترم ده
ومش قادرة افسر الموضوع ده ويا تري اسبابه
علي كل حال انا طبعا بقالي فترة مش متواجدة هنا في مدينة
المدونيين
وده برضه بسبب كليتنا الغراء
والقرف والبهدلة اللي احنا فيها

اما الان
فمع كام خبر في السريع من راديو سفروتة
لاني ورايا امتحان اوبئة والمادة بصراحة لا تطاااااق




اخبار الكلية

كليتنا الغراء بجامعة المعز لدين الله الفاطمي يدوب ممن اسبوع عرفت انه النظافة من الايمان
واصدرت منشور ملكي بيحتم علي كل طالب وبجدول زمني معين المساهمة في تنضيف المدرجات
H1N1وده طبعا بعد ذوبعة فيروس
واللي بيعتقد البعض انه بانتهاء الازمة ستعود الكلية الي سابق عهدها
مع العلم ان الكلية لم تتخذ اي اجراء ضد صناديق القمامة المنتشرة في ارجائها ولم تفعل شيئا ازاء ما يوجد امام عنابر
العجول(وانتوا فاهمين قصدي) وانت رايح علي سكشن الولادة
وعجبي


بعد قضاء فترة ثلاث سنوات من السجن المشدد وبداية العام الرابع من المدة اصبح من البديهي ان يقول الدكتور في الاسبوع الاول (ان شاء الله في امتحان يوم كذا ) والمشكلة لا تكمن هنا وانما تكمن في الغيرة الفظيعة التي تسيطر علي باقي الدكاترة فبمجرد ان يتفوه هذا الدكتور الاولاني بكلمة امتحان ..تتكرر هذه الكلمة علي ألسنة الباقي
اشمعني هما يعني


بعد ان تسربت الي مسامع اساتذة قسم التغذية انه بعض الطلبة مبتفهمش من دكتور طارق في السكشن وانهم مبيحضروش سكشنه وبيحضروا في سكشن تاني...حلف السيد المبجل رئيس القسم مية يمين انه مفيش حد يحضر برة سكشنه وعلق فرمان بذلك امام مدرج 5 واللي مش هينفذ القرار ذنبه علي جنبه
مبسوط يا عم طارق...اي خودعة


يناشد سكان قصدي طلبة الفرقة الرابعة القائمين علي سكشن الباطنة
انهم يعالجوا البقرة المسكينة اللي بتعاني من
diarrhea
بقالها اسبوعين تقريبا
كل ما تدخل السكشن نلاقي عندها نفس الحالة
صبرها يارب

اما الان فإليكم بيان بمواعيد امتحانات الميد تيرم


ولا اقولكم بلاش عشان متتصدموش

ـــــــــــــــــــــــــــــــــــــــ

اخبار سفروتية

بعد ان ساد اللغط وكثر الكلام حول اللقاح المزمع استيراده لعلاج اللي متتسماش قررنا نحن في مملكة سفروتة عدم استيراد اللقاح عاملين بمبدأ الباب اللي يجيلك منه الريح سده واستريح


اعاني هذه الايام من حالات نووووووووووم عميقة لا تتناسب مع الوضع الحالي وما تشهده الساحة الدراسية من امتحانات تطرق الابواب
سيبكم انتم .. مفيش احلي من النوم


الان انا في محاولات جدية لاتخاذ خطوات هامة في تخصص الارانب
لقيت نفسي فيه


بعد محاولات عديدة قررت اني مرجعش اسرة سمارت فيت تاني ولا اني اشارك في اي اسرة جديدة ...لعدة اسباب منها الفقر الفكري اللي محاوطني اليومين دول معرفش ليه...تقريبا من كتر حبه ليا..والمزاج المتقلب


الثلاثاء القادم 27 / 10 في تمام العاشرة صباحا
هكون موجودة في جامعة القاهرة
في معهد البحوث والدراسات الافريقية
وده لأن بابيتو (بابا يعني)العزيز هيناقش رسالة الدكتوراة بتاعته
"الاشراف في مصر والنوبة في عصر المماليك"
جيراني المدونيين الدعوة عاااااااااااااااامة لاي حد يحب انه يحضر بجد هينورني ويشرفني وهبقي مبسوطة اوووووي انه حضر المناقشة


توماااام يا بشر؟؟

ــــــــــــــــــــــــــــــــــــــــ

ومن الاخبار العالمية



بلاش بلاش
كلها تغم النفس

كفاية عليكم كده
هروح اشوف الاوبئة بقي
انها تناااااااااااااديني




Tuesday, October 6, 2009

حواديت من وحي أكتوبر


كان عندي احساس غريب اني هرجع اكتب تاني في اليوم ده
في ذكري الانتصار
في ذكري الايام الحلوة
واللي المفروض يكون بعدها اجمل واجمل لكن دلوقتي شايفين العكس تماما

ما علينااا مش هنتكلم بكآبة ومش هنضيع فرحة علي الاقل علي ذكري جميلة في نفوسنا كلنا

حبيت ارجع وأأرخ لاحساس معين حسيته في وقت من الاوقات

زمان وأنا صغيرة كانت ذكري انتصار أكتوبر بالنسبة لي فرحة بس فرحة عادية
واستني فيلم الطريق الي ايلات والرصاصة لا تزال في جيبي والعمر لحظة
والافلام الكتير دي اللي كان التلفزيون بيتحفنا بيها

لكن بجد اول مرة احس فيها فعلا بنشوة الانتصار زي ما بيقولوا
في اليوم ده
وقتها كان عندي 12 سنة

كنا في منتصف شهر سبتمبر تقريبااا وكان عندي تسجيل في الاذاعة
كالعادة كنت بقضي اجازة الصيف في التمثيل في برامج الاطفال
في اليوم ده كان عندي تسجيل برنامج صندوق الدنيا
خلصت تقريبا ع الساعة واحدة
وفوجئت انا والولد زميلي اللي كمل معايا لنهاية التسجيل ان ابلة سهير المخرجة عايزانا ضروووري عشان نسجل تيتر مسلسل جديد عن ذكري انتصار أكتوبر اسمه(حواديت من وحي أكتوبر) وطبعا كان لازم نلبي الطلب
بالمناسبة الولد زميلي ده يبقي (محمد محمود) اللي كان بيعمل مسلسل بكار

المهم
قعدنا مع ابلة سهير نعمل بروفاا ع التيتر
كانت كلمات المقدمة بتقول

لما نقول أكتوبر
نسمع كلمة نصر
ولما بيجي النصر
نردد كلمة مصر

وكلمات النهاية بتقول

يابكرة انت اجمل
يا بكرة ملكش مثيل
كلنا احفاد أكتوبر
وحواديتنا معناها جميل

سجلنا التيتر والحمد لله طلع جميل
وكان موعدنا الاسبوع اللي جاي عشان نسجل حلقات المسلسل
لسوء حظي اني جالي دور برد شنيييييع قبل ال
تسجيل بيوم
ومقدرتش اسجل مع زمايلي حلقات المسلسل

ولما عرفت ميعاد اذاعته في الراديو بقيت استناه واسمعه
وفي حلقة يوم 5 أكتوبر
كانوا جايبين مشاعر الناس في اليوم ده
وقد ايه الناس كانت بتتمني انها تتخلص من الكابوس ده
ونفسهم يحاربوا وياخدوا بتارهم من اسرائيل
والحلقة قفلت علي الجملة دي

الناس كانت مستنية بفارغ الصبر!!1

بعد ما سمعت الحلقة
حسيت انه كان فيه بجد معاناة
وان الانتصار والنجاح بعد الفشل بجد له طعم حلو اووووووووووي
وان انتصارنا في اليوم ده كان حاجة كبيرة اوي
والعالم كله اتكلم عنه
انتبهت بعدها الي ان 6 أكتوبر ده يوم عظيم اوي في حياة كل مصري
وبعدها في كل سنة
احس الاحساس الجميل ده

بس للأسف دلوقتي بقيت اتنبه لحاجات
مش حلوة
ولذة الانتصار راحت زهوتها من عندي
انتصار 73 كان ممكن يبقي اجمل واجمل
لو مكانش كل اللي بيحصلنا ده حصل

زي ما قلت في الاول مش عايزة اكئب الناس
يمكن احس النهاردة بلذة الانتصار من تاني


كل سنة وانتي طيبة يا مصر

Thursday, September 24, 2009

شوية وراجعين

ملل
خنقة
فقر فكري
كركبة
لخبطة
مش عارفة فيه ايه بجد

بس كل اللي اعرفه اني محتاجة اجازة
ممكن تطول
ممكن تقصر
بما اني مجنونة ممكن تلاقوني فتحت المدونة بكرة
عااااااادي جدااااااااااا
توقعوا مني اي شئ

هتوحشوني وهتوحشني مدوناتكم كلكم
وهفتقد مناكفاتي معاك يا والدي

واتمني اني لما ارجع الاقيكم في احسن حال
يلا
سلام عليكم

Thursday, August 20, 2009

شرفتناااا....نورتنااااا




كـــــــــل سنــــة واحنا كلنا طيبيـــــــــــــــــــن


ورمضان كريم علينا جميعاااااااااااا




نزلت النهاردة اتسوق

لقيت رمضان في كل حتة

والزينة مالية الشوارع

والناس بتشتري فوانيس


اخخخخخخخخخ


الفااااانوس


معرفش ليه السنة دي بجد عندي رغبة شديدة اني امسك فانوس وألعب بيه


شكلي كده هستعيل تاني


(هههههههههههههههه وانا من امتي كنت كبيرة )




المهم

اي حد هيجي هنا لازم يكون في ايده فانوس

وشرط انه يكون فانوس من فوانيس زمان

مش الفوانيس الهبلة بتاعة اليومين دول
والناس اللي في ذمتها فانوس تجيبه

هااااا .. ولا يحبوا افضحهم في وكالات الانباء السفروتية؟؟

انا بقول الطيب احسن برضه

وكده كده هيجيبوا الفانوس من سكات

:D




رمضان كريم علينا كلنا


ويارب السنة دي نكون استعدينا نفسيا وروحيا للشهر الجميل ده


ومفيش حاجة تسرقنا منه باذن الله




كل سنة وانتوا طيبين


يا أحلي اخوات

Monday, August 17, 2009

ماذا يكمن في نفس الطبيعة؟؟؟

من مدة قريبة كنت قاعدة فاضية وزهقانة بعد امتحان التدريب


اعمل ايه ... اعمل ايه... جريت ع المكتبة عندنا في البيت


وده طبعا لان القراءة عشقي الاول والاخير


بس المشكلة اني وقفت قدام المكتبة وأنا في حيرة فظيعة


المكتبة نصها كتب في التاريخ ...ربعها كتب في الاعلام والدين...الربع التاني ادب بكل انواعه وروايات انجليزية ومجلات العربي


هاا.. بس..ايوة.. في رف فيه كتب سلسلة عالم المعرفة


اهاااااااا...ومشيت بصوابعي علي عناوين الكتب بتاعة عالم المعرفة لحد ما صباعي وقف علي كتاب اسمه


الفلسفة البيئية...من حقوق الحيوان الي الإيكولوجيا الجذرية


انا فاكرة اني قريته قبل كده ... ومعلمة علي صفحات جواه..وحاطة اسهم علي شوية فقرات عجبتني وكمان سابت وراها تساؤلات كتير


بس مفيش مانع اني استرجع اللي فيه من تاني


وطلعته ورحت اوضتي وقعدت استمخ فيه


ووصلت للصفحة رقم 118 ولقيتني حاطة سهم علي الفقرة دي


ويظل موضع ترقب إن كان هذا القادم الجديد قادرا علي البقاء بمقدار ما بقيت الأنواع الحية الاخري.لكن ثمة بالتأكيد فظاظة في الطريقة التي ينظر بها البشر شذرا نحو الحيوانات "الأدني" خصوصا تلك التي انقرضت . فمثلا،نحن نعدّ الديناصورات فاشلة بيولوجيا علي الرغم من أنها وجدت علي كوكبنا طيلة 65 مليون سنة . وقد عبر احد الكتّاب عن هذه النقطة بشكل مبسّط وجميل وقال


نتحدث أحيانا عن الديناصورات الفاشلة ، سيكون الوقت كافيا لإطلاق هذا الحكم عندما يمرّ علينا مجرّد عُشر مدة بقائها.




يا نهار أبيض... احنا فعلا كده ... طب وأنا مستغربة اوي ليه كده؟؟؟


اذا كنا احنا الدكاترة اللي بنعالج الحيوانات البشر اللي زينا بينظروا لينا نظرة دونية


وبيتقال علينا دكاترة بهايم..و..و...و..و


يبقي اكيد مؤكد فيه ناس فعلا شايفين ان الحيوانات دي اصلا مش من حقها انها تستمتع بالطبيعة معانا


وكأننا احنا بس اتخلقنا لوحدنا ع الارض دي ومش عايزين حد تاني من اي جنس اخر يعيش معانا


هو بمزاجنا؟؟؟




فقرة تانية في الصفحة اللي قدامها يعني الصفحة رقم 119 كانت بتقول


إذن ، في حال حدوث الفناء الشامل النهائي والمطلق لنوعنا البشري ( وهذا ما جلبناه بأيدينا؟ ) وإذا لم نحمل معنا جميع الاخرين إلي النسيان، فعندها لن يتمكن مجتمع الحياة علي الأرض من الاستمرار وحسب ، بل من المحتمل جدا أن ازدهاره سوف يتعزز . باختصار ، ان حضورنا ليس ضروريا ، فلو اتخذنا وجهة نظر مجتمع الحياة واعطينا الصوت لمصلحته الحقيقية ، فمن المحتمل جداااا أن نهاية حقبتنا ذات الانشات الستة ستكون موضع ترحيب عارم




هو طبعا اللي كتب الكتاب ده واحد اجنبي وهو عبارة عن تجميع لمقالات بتتكلم عن الطبيعة والبيئة فكون انه يتكلم عن الفناء للجنس البشري وكده ده عندهم عادي ... انا بس لفت نظري في العبارة دي انه فعلا لو تخيلنا... بفرض التخيل يعني.. اننا اختفينا معقول باقي الكائنات هتفرح اوي كده


الانسان دمر كتير اوي


وعذب كتير اوي


تفتكروا لو الكائنات اللي حوالينا دي امتلكت دلوقتي المقدرة علي الكلام والتعبير هتقدمنا للمحاكمة امام محكمة الطبيعة؟؟؟




اترك لكم الجواب




ـــــــــــــــــــــــــــــــــــــــــــــــــــــــــــ


الكتاب: الفلسفة البيئية .. من حقوق الحيوان الي الإيكولوجيا الجذرية


تحرير: مايكل زيمرمان


ترجمة : معين شفيق رومية


صادر عن سلسلة عالم المعرفة


Sunday, August 9, 2009

حدث في حياتي


اولا : بجد بجد بجد بشكركم جدااااااااااااااااااااااااااااااااااااااااااااااااا ووالله مش عارفة اقولكم ايه يا أحلي اخوات

الحمد لله ماما خرجت من المستشفي امبارح ورجعت البيت بالسلامة

بجد متشكررررررررة اوي ليكم كلكم ولكل اللي سأل علي ماما سواء بالتليفون او ع الايميل او في المدونة

وربنا يخليكم ليا يااااااااااااااااااااااااااااارب

يا احلي اخوات


ثانيا : البوست ممكن يكون طويل شوية

ممكن تحسوه ملخبط

ممكن يكون بالنسبة لبعضكم مش ذو اهمية او مش هيقدم جديد

بس هو بالنسبة لي مهم اوي

وتأريخ لحدث مهم اوي في حياتي

وبعد اذنكم يعني انا لازم أأرخه هنا في المدونة


ــــــــــــــــــــــــــــــــــــــ

الفترة الاخيرة يعني نقدر نقول من سنتين كده

بدأت تتواجد احداث في حياتي اثرت فيا اوي

انتبهت ليها جداااااااا

يمكن عشان بدأ تفكيري يكبر ومداركي توسع انتبهت للاحداث دي

بدأت اشوف كل حدث بمنظور مختلف

لو كنت في سن قبلها مكنتش فكرت فيه بالطريقة دي


طب بيطري ..كانت حدث... ومازالت لانه كل يوم تفكيري بيتغير

اسـرة سمـارت فيـت .. حدث

ايمي بيبي .. حدث

راديو كام..اللي سبته من اسبوعين.. حدث

التدوين..اكبر حدث

تجربتي مع الكتابة الساخرة.. حدث

هو .. حدث

مركز البيوتكنولوجي.. حدث وحدث مهم جدا كمان

سفروتة نفسها .. بعتبرها حدث بحس انها حاجة مستقلة عن نوران ليها وقت لازم تظهر فيه ووقت لازم تختفي فيه ههههههههههههههه محدش يقول عليا اتجننت


لكن فيه حدث مختلف اوي .. كان نفسي اعيشه من زمان..بس ياتري كنت هحس بيه اوي كده لو حصل من زمان؟؟


ام ميناس


الحدث بدأ في

الاربعاء 5 - 8- 2009

غرفة 642 بمستشفي معهد ناصر


بابا : نوران دي ام ميناس.. من غزة بلد الابطال

نوران : اهلا وسهلا .. نورتوا مصر

ام ميناس : مصر منورة بأهلها

بابا : تخيلي يا ام ميناس نوران في سنة كام.. رايحة رابعة طب بيطري.. واللي يشوفها ميقولش عليها كده

نوران : ههههههههههههههههه خلاص يا بابا لازم بقي الفضايح دي في كل حتة


وضحكنا كلنا ودخلت ميناس وعرفت انها رايحة تالتة ثانوي قسم ادبي وشكلها هي كمان ميقولش عليها انها في ثانوية عامة خاااااالص ...سفروتة كده زيي


ام ميناس : لكن ليش ما دخلتي طب البني ادمين .. كنتي بقيتي طبيبة للبني ادمين احسن وعالجتي ماما

نوران : ههههههههههههههههه والله هي حكاية طويلة .. بس علي فكرة الطب البيطري برضه مجال لذيذ


ام ميناس جاية عشان تعالج بنتها ميناس عشان عندها حصوة في الكلي وبتعملها هنا تفتيت وبقالهم شهر في مصر المفروض كانوا يسافروا في اليوم ده اللي هو الاربع بس المعبر اتقفل وملحقوش يسافروا ومنتظرين انهم يمشوا الاربع الجاي


مكنتش متخيلة اني ممكن اقابل حد وجها لوجه من فلسطين وكمااااان من غزة ... يعني المعايشة للضرب والحصار والنار والصواريخ ... يعني المعاناة بمعناها المر


كنت بتمشي في الاوضة من كتر الزهق .. بعيد عنكم زيارات المستشفيات لا تحتمل اكتر من نص ساعة .. بس بابا كان سابنا ومشي عشان معاه شغل وانا واخواتي كنا مستنيين عمي يجي ياخدنا

ام ميناس كانت قاعدة علي شنطة كبيرة اووووي كان فيها الاغراض بتاعتهم

وانا بتمشي كده عيني جات في عينها فابتسمت ليها ابتسامتي المعهودة(يعني الابتسامة الهادية الخجولة)فشاورت لي بايدها اني اجي اقعد جنبهااا

قعدت وبدأت لحظة الاستجواب

هههههههههههههههههههههههههههههههههه بقول محدش يقول علياا مجنونة


نوران : فلسطين حلوة؟؟

ام ميناس : اي حلوة فَلَسطين .. بس اليهود الله ياخدهم ما مخلين شئ... غزة جزء صغير من فَلَسطين..نحنا ياللي ساكنين بغزة بيقولوا علينا المهاجرين ..اليهود واخدين فَلَسطين كلها ليهم

نوران : اهااا..طيب هو الاحداث الاخيرة اللي حصلت دي كانت يعني ........ وقبل اما اكمل لاني بصراحة مكنتش عارفة اكمل هي اتكلمت

ام ميناس : نحنا كنا في وسطها..وسط الضرب والنيران..كنا بنام ونقول انه ما رح نصحي تاني .. بتبقي نايمة وخايفة ليجي عليكي صاروخ.. بتعرفي نحنا ولادنا كلهم بيشتغلوا في المقاومة ..ما نتمني غير الشهادة .. صار لنا اكتر من 60 سنة محتلين مو معقول اننا نترك القضية وفَلَسطين لليهود هيك... نحنا بنعرف انه مارح تنتهي الحرب الي يوم الدين بس احنا بنقاوم ورح نضل نقاوم

نوران : والله انتوا فعلا ابطال انكم صامدين وسط الضرب والنار ... بس انا بجد نفسي اعرف يعني هو عندكم هناك فيه بيوت كده وعمارات زي هنا ومحلات وكده يعني؟؟ اصل انا بصراحة مش بشوف في التليفزيون غير حاجات مهدومة وبيوت واقعة وكده

ام ميناس : ابتسمت وقالتلي .. اي عندنا زي عنديكم بس اليهود ما بيخلوا شئ .. اي حدا بيبني بيت او مصنع او يعمل تجارة بيخربوها .. اشجار الزيتون والبرتقال كل ما نزرع اشي بيقلعوه اليهود.. صرنا نعاني من نقص بالادوية والغذاء ... الطفل عندنا ما بيعرف ايش طفولة .. ايش يرفه عن نفسه ولا بيفكر انه يلعب حتي ..عايشين بخوف منتظرين بأي لحظة انه ينضرب علينا صاروخ او البيت ينهد

نوران : اااه... دول بيضربوا المدارس كمان بجد ربنا ينتقم منهم ذنبهم ايه الاطفال يعني

ام ميناس : ما عندهم رحمة .. ما بيفرقوا ما بيعرفوا .. اي حدا مستهدف وبيته بيكون جنب مدرسة المدرسة بيقصفوها هي كمان... بتعرفي نحنا ما عندنا كلية طب .. اللي بدوا يدرس طب بيسافر ع برا يروح امريكا روسيا مصر باكستان وفيه منهم اللي بيرجع وفيه اللي ما بيرجع

وبعدين جبنا في سيرة عباس وفتح وحماس .. وشوية شوية دخلنا في موضوع الفساد بس لميت نفسي وقلت خليني ساكتة بدل ما افتح في الكلام واروح في الرجلين

علي الساعة سبعة كده كنت بقاوم النوم بس مقدرتش وقمت سندت كده بايدي علي شنطة الاغراض بتاعة ام ميناس ونمت ومحسيتش بنفسي

ولما صحيت قالتلي

ام ميناس : هيك يا نوران انتي كأنك رحتي ع غزة وجيتي... نحنا بنام في المعبر هيك علي شنط الاغراض باليومين والتلاتة منتظرين فتح المعبر

نوران : كان الله في عونكم بجد


وبعدين عمو جه اخدنا وسلمت عليها وعلي ميناس بس نسيت اخد رقم تليفونهم

لما ماما رجعت قالتلي انهم اخدوا رقم التليفون عشان نطمن عليهم من وقت للتاني وبابا كمان كتبلهم عنوانا عشان يزورونا قبل ما يسافروا

بجد نفسي اشوفهم تاني اوووووووووووووووووووي


ميناس دي حتة سكرة

والام في عينيها نظرة الفلسطينية اللي نفسها ترجع بلدها وارضها ...نفسها تنام وهي مطمنة ...نفسها تعيش هي وولادها زي ما شايفة المصريين عايشين(مع انها متعرفش اللي فيها والفساد المهبب اللي هنا اللي العن من الاحتلال)بس برضه بقول الحمد لله اننا كفاية بنام واحنا مطمنيين انه مفيش صاروخ هيجي علينا

كانت مفاجأة ليا اني اشوف حد من فلسطين

كنت مبسوطة اوي بكلامي معاها ونفسي اسمعها تاني وهي بتحكيلي عنهم

حسيت من كلامها اني مسؤولة

لازم اعمل حاجة عشانهم وعشان فلسطين

عايشين وسط هم كبير اوووووووي

اليهود مسممين عليهم عيشتهم

فعلا كان الله في عونهم


انا اتكلمت مع ام ميناس كتير اوي

بس حبيت انقل المشهد العام للي حصل
يعني ده جزء بسيط اووووووي من رغيي معاها


ونأسف للرغي الكتير اللي رغيته

(وش مكثوف)

دمتم بخير


Thursday, August 6, 2009

طلب صغير

سلام عليكم جيراني المدونين
ياريت يا جماعة تدعوا لماما
اووووووووووووووووووووووووووووووووووووووووي
(عملت عملية امبارح العصر)
والعملية للاسف كبيرة اووووووووي
بجد ماما محتاجة دعوات كتيييييييييييييييييييييييير
ربنا يشفيها يارب
وترجع البيت بالسلامة
مش هقدر انتظم في متابعتكم اليومين دول
اعذروني

Tuesday, July 21, 2009

تلاتة مستفزة وتلاتة فرستني


تلك المواصلة اللعينة

(الميكروباص)

وخاصة تلك الكنبة الخلفية التي دائما ما تقترن بهذه الجملة

(اربعة ورا يا أفندية؟؟؟)


من هذه الكنبة كان هذا الموقف المستفز بكل معاني الكلمة


انا وصديقتي (ايمان نبيل... دي علي فكرة غير ايمي بيبي)كنا مدعويين لحضور محاضرة بعنوان نحو حياة افضل وكان المحاضر ولد زميلنا في الدفعة ... يعني الموضوع كان شبيه بالعروض الخاصة للافلام السينمائية

المكان كان في المنيل

السيد محمد جمال زميلنا تكرم ووصفلنا نركب ازاي من الجيزة

هنركب ميكروبااااااص السيدة عيشة

ماشي ... تمام وزي الفل ومعترضناش


ركبنا الميكروباص ولحظنا العاثر انه كان فيه مكانين فقط فاضيين وفي الكنبة اللي ورا خالص

كان قاعد راجل علي طرف الكنبة وواحدة ست قاعدة علي الطرف التاني

يعني المكانيين الفاضيين كانوا فين؟؟ في النص ما بينهم

طيب مفيش مشكلة احنا هنيجي ناحية الست شوية والراجل كان محترم بصراحة ولزق في الشباك

الست الحلوة الامورة بقي قالت لنا ايه؟؟

ايه مالكم كده ما تدخلوا شوية انتوا خايفين ولا ايه ولا انتوا من الحزب اللي بيقول ان اللي يقعد جنب الرجالة يخش النار؟؟

وصوتها كان عالي جدااااااااااااااااااااا

والعربية كلها رجالة اساسا

كنت هموت وارد عليها بس للاسف عِرق الاحترام نقح عليا واحترمت سنها وان العربية كلها كمان رجالة

وسكت وحطيت جذمة قديمة في بقي

ولما العربية وصلت لنهاية كوبري عباس

ايمان بتقول للسواق

ايوة علي جنب لو سمحت

قامت الست اياها الحلوة الامورة دي قالت ايه

كمان اسمها لو سمحت؟؟؟؟؟ علي صوتك شوية يا ماما وقوليله علي جنب


والله بجد انا كنت ماسكة روحي من الضحك بالعافية ولساني كمان

بجد كان نفسي اديها كلمتين محترمين

بس اعمل ايه في عِرق الاحترام اللي نقح عليا ساعتها ده


بجد انسانة مستفزة
مستفزة
مستفزة

تلاتة مستفزة


المشكلة اننا مش مضايقينها في القعدة

لاننا اصلا رفيعين


..........


في كده ناس دايما يحبوا يعملوا لنفسهم شوو في اي حتة

وبأي طريقة

طب طالما هي بتكره حزب اللي يقعد جنب الرجالة يخش النار(حزب عجيب بصراحة واول مرة اسمع عنه) مقعدتش بقي جنب الراجل ليه؟؟؟؟؟؟؟؟؟؟؟؟

فرستني

فرستني

فرستني

تلاتة فرستني


Sunday, July 12, 2009

سنتااااان من الحب والايخاء


كــل سنــة وانتــي .. طيبـــة يا مدونتـــي

وبعودة الايام

تفرحــي وتتهنــي .. وفــ عيـــدك نغنـــي

احلي الكلام



فلينقشع الصمت

وليبدأ الرغي

إيذانا منا نحن(سفروتة هانم) بمرور عامين كاملين علي دخولي عالم التدوين



في الاول لازم اقول اني عندي بنوتة اكبر من حبــــة صمــــت

اللي هي سكوب واللي منها بدأت اكتب وادون وانجذب للعالم العجيب ده



اول بوســـت كتبتــه هنا في حبـــة صمـــت

قلت فيه اني هكتب عن اي حاجة سواء الحاجة دي خلتني افرح، ارقص، اغني، احزن او ابكي

وده فعلا اللي حصل ... كل بوست كان بيحمل معني واحد من المعاني اللي فوق دي

وانا بقلب في دفاتري القديمة قصدي (صمتي القديم) فليت الارشيف كله واستعدت ذكريات ومواقف كل بوست

وقريت الكومينتات كمان

وكل بوست كان بيفكرني بحاجة معينة

ياااااااااااااااااااه يا اولاد

لما الواحد يقعد مع نفسه كده ويفتكر في

هدوء وصمت ووقت الفجرية

بجد احساس راااااااااااااااااائع



ام هند

مبسوطة اني لسة معاكم ويارب افضل معاكم علطول

مبسوطة عشان كل بوست بكتسب ناس جديدة وآراء جديدة وافكار مختلفة

مبسوطة عشان بجد بحس انكم عيلتي التانية ...وده اجمل احساس



جميع جيراني المدونين مدعويين لحضور الاحتفال بالمملكة

ملحوظة : الدخول ببطاقات الدعوة الرسمية اللي عليها الختم السفروتي من ورا.... ركزوااا ها اهم حاجة الختم يا جماعة

ــــــــــــــــــــــــــــــــــــــــــــــــــــــــــــــــــــــــــــــ
حاجة كده هقولها لنفسي متاخدوش في بالكم انها لحظة الجنون
بت يا نوران
انتي مبسوطة باللي بتعمليه ده
هو انتي واخدة الاجازة عشان ترتاحي ولا عشان تنزلي كل يوم
يا بنتي ده كفاية التدريب المتخلف بتاع الكلية كمان هتحملي نفسك فوق طاقتها وتنزلي مزارع وكمان تروحي الراديو
طب انتي بتعملي كده ليه؟
حاسة ان كل حاجة اتكربست فوق نفوخك صح؟
مش لاقية وقت تقعدي معاهم في البيت
ولا تشوفي صحابك
ده حتي البت ايمي مقصرة معاها
طب افهم بس انتي ناوية علي ايه؟
عايزة تبقي فين؟
الطب ولا الاعلام؟
طب ولو اختارتي الطب
هتبقي مشاريع ولا ابحاث زي ما كنتي طول عمرك بتتمني ولسة بتحلمي بحلمك الكبير
فاكراه؟؟
فاكراه يا نوران
طب ولو اختارتي الاعلام
هيبقي راديو الحكومة ولا راديو النت؟
بيني وبينك يا بنتي انتي هتنفعي في الاتنين وبشهادة الجميع
بس مجالك؟؟
انتي اصلا اخدتي كورس الارانب ليه؟؟
طب نزلتي المزرعة امبارح ليه؟
طب بتفكري جديا انك تروحي تدربي في عيادة حيوانات اليفة ليه؟
ما هو بصي بقي
حاجة واحدة بس
بس عارفة انتي ممكن تربطي الاتنين ببعض
هبقي اقولك ازاي بعدين
بس المشكلة دلوقتي في الزنقة المنيلة بنيلة اللي زنقتي نفسك فيها
يا بنتي ده انتي كمان شوية وهتختفي وهتبقي محتاجة ميكروسوب فعلا عشان يشوفوكي بيه
اهدي كده واركزي
ورتبي افكارك
وربنا يهديكي يا بنتي
بجد ربنا يهديكي
انا عارفة كان مستخبيلك فين ده كله

Wednesday, July 1, 2009

هندســـة حيــاتـيــة


تساءلَت : هل هناك ما يسمي بالحب؟


كان كل ما يشغلها هو دراستها وطموحاتها العلمية البحتة .. كانت تقضي الليالي الطوال وسط تخيلاتها ..اكتشاف يخدم البشرية ..جائزة نوبل .. فرحة والديها بها .. واخيرا ذكر الناس لها بعد موتها بكل الخير .. فهي تعلم انه هناك الكثير ممن يحبونها .. ولاسباب كثيرة ولكن كم كانت حمقاء عندما اعتقدت ان الحياة دائما تسير كما يُخطط لهاا

احمق من يعتقد ان الحياة دائما تسير كما يُخطط لها

لابد للخط المستقيم من ان يحيد عن المسار المرسوم



تساءلَت : لماذا طرق الحب بابها في تلك الساعة؟؟



حاد الخط المستقيم عن مساره.. ياالهي لم يكن ذلك في مخططها .. ارتبكت بعض الشئ .. ولكن في لحظة ما .. شعرت بارتياح كبير لذلك الانحراف .. وقامت مجددا بتعديل مسار خطها المستقيم بعد ان اضافتاليه تلك النقطة .... الحب



احمق من يعتقد ان الحياة دائما تسير كما يُخطط لها

لابد للخط المستقيم من ان يحيد عن المسار المرسوم



تساءلَت : لماذا نحب الحياة اكثر مما كنا نحبها بعد تلك النقطة؟؟


بعد ان كانت تملك قلبا خاصا بها .. وكان يملك قلبا خاصا به .. توحد القلبان ليصبحا كيانا واحدا .. ربما كان هولا يشعر بذلك طوال الوقت .. لانه كان دائم اللوم لها .. دائم العتاب .. بانه لايشعر بما يكمن بداخلها .. ولكن يكفيها انها كانت تشعر به ..احست ان كل شئ في حياتها تبسَّط بعد التعقيد .. وتبسم بعد العبوس


احمق من يعتقد ان الحياة دائما تسير كما يُِِخطط لها

لابد للخط المستقيم ان يحيد عن مساره المرسوم




تساءلَت : هل من الممكن ان ينفطر القلب الواحد ويعود الي سابق عهده ..قلبين؟؟



كان دائما يؤرق ذهنها بكلمته تلك "فرق التوقيت" .. كم كانت تمقت هذه الكلمة .. فهي كفيلة بان تزرع كل معاني الخوف بداخلها .. واصبحت عيناها تعرف طريقها للدموع.. ونظراتها عابسة بعد الابتسام .. وتعقدت الحياة بعد التبسيط

احمق من يعتقد ان الحياة دائما تسير كما يُخطط لها

لابد للخط المستقيم من ان يحيد عن مساره المرسوم



تساءلَت : هل كان يحبها؟؟


هل كانت هي تحبه؟ .. نعم هي تعرف ذلك جيدا .. فهو كل حياتها .. ربما لم تكن تظهر مشاعرها تلك .. ولكنها كانت تنتظر الوقت المناسب .. خوفا من ان تفقده ....... ولكن ...... ما هذا؟؟؟لقد فقدته بالفعل ... لقد حاد الخط المستقيم عن مساره مجددا .. ااااااااااااه يارأسي


انحني الخط مجددا

ولكن الي اين هذه المرة؟

الي اين؟؟؟



هل اخطأت عندما تركت تلك النقطة " الحب " تغزو خطها المستقيم؟

هل كان محقا في كلمته "فرق التوقيت" ؟


هل اخطأت عندما اخفت مشاعرها بداخلها؟

هل اخطأ علماء الرياضيات جميعهم عندما قالوا ان الخط المستقيم لا يمكن ان يحيد عن مساره؟

ـــــــــــــــــــــــــــــــــــــــــــــــــــــــــــ


ليست فقط الانحرافات الهندسية تكون عند تلك النقطة اللي تحدثنا عنها ولكنها تشمل نقاط اخري كثيرة تختلف من شخص لآخر
فكثيرا ما نتمني الا تنحرف مسارات حياتنا ولكنها تحدث دون ارادة منا مهما فعلنا من حماية لذلك المسار العجيب


ــــــــــــــــــــــــــــــــــــــــــــــــــــــــــــ


فكرت كثيرا في عنوان للموضوع ولكن العنوان هذه المرة (هندسة حياتية) اهداء من الصديقة ايمان فهمي

Wednesday, June 17, 2009

من الارض الي مملكتي


:) شوهد السيد رومنسي وهو آت من بعيييييد متجها نحو باب المملكة فاستوقفه حارس سفروتي بس جباااااااااار


الحارس : علي فين ان شاء الله..معاك تصريح يا افندي؟؟

رومنسي : لأ .. بس انا جاي وجايب هدية لمليكتكم العظيمة ..كلام في سرك انا جايب ليها تااااااج

الحارس : (وقد شهق شهقة عظيمة ادت الي تراجع رومنسي الي الوراء قليلا) بتقووووول ايه؟؟ ...تااااااااج... ده انت يومك مش معدي ونهارك مش فايت ..انت عايز الملكة تخلع التاج بتاعها وتلبس التاج بتاعكم؟

......رومنسي : لأ حضرتك فهمتني غلط ..ده مش تاج بيتلبس .. ده

الحارس : (وقد قاطعه) بس ولا كلمة اقف عندك لحد ما ارجعلك


وبعد ما وقف رومنسي شويتين حلوين في الشمس خلته يندم انه جه هنا اصلا


سمحوله بالدخول


رومنسي : سفروت الخير ياجلالة الملكة
سفرفر : سفروت النور يارومنسي .. انا بجد متشكرة ليكم اوي ..وبلغ تحياتي لكل شعب الارض وقولهم منتحرمش من تاجاتكم..واسفة انك وقفت كل ده في الشمس ( وش مكسوف) لكن فجأة بقي ( وش شرير ذو لهجة شريرة) بس يكون في علمك من هنا ورايح مفيش اعاااااااااااااااانات ... هات يا استاذ التاج اما نشوف فيه ايه



اسمك؟

سفروتة الشهيرة بــ نوران


سنـــك؟

تسعة عشر عاااااااااااااااما


مجال دراستك؟

الطب البيطري


اسم مدونتك؟

حــــبـــــة صـــــمـــــت

وعندها اخت بس مسافرة اسمها سكــــــوب

صورتك الرمزية في المدونة بتعبر عن ايه؟
الانيمي
والانيمي يعني كارتون...والكارتون يعني انيمي
ههههههههههههههههههههههه
خلاص خلاص
اقصد يعني من الاخر
اني طفلة
وبحب اعيش دور الطفولة اوي
ده حتي لسة امبارح واحنا خارجين من الامتحان كان معايا مصاصة
اه والله
:)

هل فكرت في اغلاق مدونتك؟ والسبب؟


اه فكرت مرة واحدة فقط


لاني كنت وصلت لمرحلة من اليأس اللحظي (حلوة الكلمة دي) ونفس السبب اللي خلاني افكر في كده هو اللي خلاني اتراجع عن الفكرة دي




ايه رد فعلك لو حد قل ادبه عليك في المدونة؟


النوعية دي من الناس بيبقوا ماشيين علي وتر الاستفزاز ..واحسن طريقة هي التجاهل ومسح التعليق وعدم اعطاء اي اهمية لناس زي دي




اسوأ مدونة دخلتها؟


شفت انا مدونات وحشة كذا مرة بس مش فاكراهم لاني كنت بخرج منها علطول




هيحصل ايه للايميل بعد ما تموت؟


هيمووووووووووت


عطيت الباسوورد لحد قبل كده؟

اه زمااااااان اديت لواحدة صاحبتي الباسوورد عشان تشوف الايميل لان النت كان فاصل عندي وقتها بس انا غيرتها دلوقتي

السفر بالنسبة لك؟


كنت بسافر وانا صغيرة فمش فاكرة ممكن كنت بحس وقتها بأيه


بس ممكن نقول بدل السفر ركوبك للميني باص يعني ايه؟؟


ههههههههههههههههههههههههههههههه


اولا لما بمشي فوق كوبري ويكون ع النيل وبالليل كمان بيبقي المنظر تحفففففففففففففففة وبحس ان النيل بيكلمني وانا بكلمه


لا مش مجنونة


ده صمتي الرائع






المود بتاعك ايه؟


متقلب لابعد درجة ممكن حد يتخيلها


وان كان كل الناس بيشوفوني مبسوطة وبضحك وبيتهموني باللسعان بس ده ظاهريا فقط وبيكون فيه حرب من المشاعر المختلطة بتدور جوايا




بتعمل ايه في وقت فراغك؟


القراءة .. النت ..او بطبق الغسيل




الاكلة المفضلة؟


البطاطس المحمرة




الصفات التي اخذتها عن والدك؟


عشقي للغة العربية والقراءة




الصفات التي اخذتها عن والدتك؟


العقاب في صمت


الامانة


والكتمان




اكتر ست حاجات بتحبهم؟


مش لازم ستة يعني




وقت الفجر والسما لسة هتبتدي تنور


النيل


الراااديو


اي حاجة تخص الجينات والهندسة الوراثية






اكتر ست حاجات بتكرههم؟


قلنا مش لازم ستة




النفااااااااااااااق ..عشان بجد حاساه اوي اليوومين دول من ناس كتير حواليا


العتاب بدون اي سبب


نظااااااام كليتنا المتخلف


التطفل




شخصيتك نوعها ايه؟


غامضة




لماذا دخلت عالم التدوين من الاساس؟


كانت صدفة بحتة ...بس حقيقي اجمل صدفة


واثرت فيا كتير




احلي جملة قيلت في وصف مدونتك؟


الصمت في حرم الجمال جمال




اهمية التعليقات بالنسبة لك؟


طبعا بيهمني رأي اللي عدي من هنا في اللي كتبته


ورأيهم ايه ونصيحتهم ليا هتكون ايه


وكمان بطمني علي احلي جيران واجمل اخوات انهم بخير وكويسين




احلي بوست كتبته؟وضع اللينك ثم اذكر السبب


لأ دي صعبة شوية


ممكن تبقوا انتوا تجاوبوا عليها وتقولوا ايه البوست اللي عجبكم




افضل مدونة قرأتها؟


ودي كمان صعبة


مش عشان خايفة حد يزعل ولا حاجة


لأ


لان كل واحد وله فكره الخاص اللي بيعبر عنه ومينفعش اقول ان ده حلو وده وحش


كل واحد بيعبر بطريقته




الشغل بالنسبة لك؟


ههههههههههههههههههههههههههه


انا لسة مشتغلتش وان كنت بحاول اني اعمل اي مشروع دلوقتي بس العملية نحس جداااااااااااااا




الانترنت بالنسبة لك؟


ادماني المحبب


اي حاجة احب استفسر عنها بجري عليه






تمرر التاج ده لمين؟


متهيألي المدونيين شبعوا من التاج ده


صح ولا ايه؟؟


ههههههههههههههههههههههههههههه


لا بجد اللي يحب يتفضله اهلا وسهلا وهيشيل معاه الاعانات اللي كنت ببعتها لشعوب الارض مع رومنسي


:)






ـــــــــــــــــــــــــــــــــــــــــــــ


وحشتوني كتير علي فكرة وخلاص بقي اخدنا افراااااااااااااااااااااااااااج وخلصنا امتحاانات امباااااااااااارح


الحمد لله