Saturday, August 16, 2008

محطات نورانية

لكل انسان منا بعض المحطات التي تغير مجري حياته وغالبا يكون ذلك التغيير للافضل ..او بعض من المحطات التي تؤثر فيه بشدة وتترك اثرا في مخيلته لا ينساه ابدا وربما يجعل منه وقودا ليدفع عجلة الحياة للامام


تذكرت منذ فترة بعضا من تلك المواقف والتي بعدها وجدت ان نظرتي للحياة او ربما لحياتي انا شخصيا قد تغيرت بعدها



المحطة الاولي


اول يوم ليا في الحضانة

ــــــــــــــــــــــــــــــــــــــــــــ


طبعا هتقولوا ايه البت دي هي كمان فاكرة اول يوم راحت فيه الحضانة وبتقول عليه محطة في حياتها.....ايون فاكراه زي ما يكون كان امبارح ...تقريبا قبل ما ادخل الحضانة كنت فاكرة اني عايشة في العالم ده لوحدي انا وماما وبابا بس ..وان محدش تاني خالص عنده ماما وبابا زيي ..كان عندي بجد معتقدات غريبة كده...واول يوم رحت فيه الحضانة لقيت كائنات صغيرة زيي ولابسة نفس اللبس بتاعي وبيعيطوا بشدة رحت معيطة معاهم انا كمان ..بس ماما جات قعدت معايا شوية وبعدين مشيت ...ومن يومها وانا عرفت اني مش عايشة لوحدي في الكون ده ..والحمد لله قدرت اثبت نفسي للجميع وكان بيسند الي مهمات كتيرة جدااااا ...حفلات واذاعة مدرسية ومسابقات ..وحاجات كتير ..ومن اليوم ده تم اكتشاف مواهبي ..وبقيت معروفة علي مستوي المدرسة من الحضانة لحد اخر فصل في اعدادي


.......



المحطة التانية


يوم دخولي مبني الاذاعة والتليفزيون

ــــــــــــــــــــــــــــــــــــــــــــــــــــــــــــــــــ



كنت رايحة عشان امثل في برامج الاطفال ..الكلام ده كان في شهر يوليو سنة 2002

اليوم ده مش عارفة ليه كنت خايفة وعندي رهبة كده ...اصل بابا قاللي ان المخرجة هتقعد معاكي شوية وتعملك اختبار صوت واداء ..وانا مش بحب كده..ههههههههههههههههههههههههههههههههه ...المهم اول لما دخلت المبني من جوا ..حسيت اني شفت عالم تاااااااااااااااااااااااااااااااني خالص ،عالم غريب بجد ناس رايحة وجاية وطالعة ونازلة وشفت الممثلين والمذيعين بتوع التليفزيون ...وكل خطوة نمشيها جوة المبني الاقي حد وقف يسلم علي بابا ...لحد اما خلاص كنت هقف اتوماتيكيا بين كل خطوة وخطوة...وصلنا الدور الرابع ودخلنا استوديو 39 لقيت ابلة سهير المخرجة اخدتني بالاحضان وسلمت عليا بحرارة ولا كأنها تعرفني من يجي خمسين سنة...طبعا هي بكده ازالت كل الخوف اللي كان عندي..دخلت الاستوديو بتاع التسجيل وقالتلي امثل مع زمايلي دول ومن غير ما اعرف كانت عملتلي اختبار الصوت والاداء...ومن يومها وانا عرفت من المحطة دي ان سفروتة عندها موهبة التمثيل والاداء الاذاعي..وبقيت اروح كل يوم احد واربع ..الساعة واحدة الضهر ....ده كان ميعاد التسجيل ...واستمريت لحد قبل الثانوية العامة وبعد كده توقفت...بس ده ميمنعش اني بروح اطل طلة عليهم برضه من وقت للتاني

مبني الاذاعة والتليفزيون بجد عالم غريب اوي ...كنت اشوف الستات وهما بيبوسوا الرجالة عادي جدااااااااااااااااااااا ..والستات العجوزة لابسين كات وجيبات قصيرة اووووووووي ...كمان شوفت فيه اماكن شيك جدااااااااااااااااا واماكن مهجورة او بمعني اصح محدش بيهتم بيها...اتاري بقي الاماكن النضيفة الشيك دي هي اللي بيعدي عليها الريس لما بيكون عنده زيارة للمبني

منساش ابدا اليوم اللي سلمت فيه علي ابلة فضيلة ...كنت موجودة في الاستوديو ساعتها وكنا بنعمل بروفة عشان هنسجل ..وبعدين لقيت ابلة سهير المخرجة بتقولي تاعلي يا نور سلمي علي ابلة فضيلة ...انا اول لما شفتها مصدقتش انها هي كانت عجوزة اووووووووووي مش زي صوتها خالص ....ولقيتها بتقولي قوليلي بقي يا نور انا فعلا شكلي كبير اوي كده غير صوتي؟؟؟ اصل فيه بنوتة قالتلي كده ...انا طبعا معرفتش ارد اقول ايه وابتسمت كده بس الحمد لله ابلة سهير انقذتني وقالتلي يللا يا نور ادخلي راجعي النص مع زمايلك

المحطة التالتة

يوم لما دخلت الجامعة

ـــــــــــــــــــــــــــــــــــــــــــ

بعد اما كنت في مدرسة ثانوي بنات بس ..دخلت الجامعة واصطدمت بالولاد من جديد ...كنت بكلمهم عادي جداااااا وبعاملهم معاملة اخوية بحسن نية ...بس للاسف اتضح ان المعاملة دي متنفعش ..اصل الولد بيفتكر ان خلاص طالما البنت كلمته يبقي هو مفيش زيه وايه بقي يبتدي يتخطي حدود المعاملة ويبان علي حقيقته...انا منكرش ان فيه بعض منهم محترمين جدااااا ومعاملتهم في حدود الزمالة وبس ....بس انا بعدها قررت اني احجم عن معاملة الولاد الافي الحدود الضيقة اوي ...واللي عايز حاجة ياخدها وبعد كده ولا كأنه جه كلمني ...ودي بصراحة اريح معاملة

..........................

طلعت من التلات محطات دول بالاتي

بفضل الله قدرت اثبت نفسي في مدرستي علي مدار العشر سنين اللي قضيتهم فيها وانها كانت هي الاساس في اني ابقي نوران اللي الناس دلوقتي يعرفوهاوبيحبوها جدااااااااااااا

ان الاذاعة ممكن تكون هي العمل البديل للطب ...بس مازلت بقول لن اعيش في جلباب ابي

:))

التأني في معاملة الولاد ...لان صوابعك مش زي بعضها

علي فكرة في محطة رابعة بس لسة وقتها مجاش ...لما يجي ان شاء الله اكيد هتعرفوها كلكم

63 comments:

ساجي said...

قمه المتعه هي القراءه لكي
---
يعني انتي تبع برامج الأطفال
ووالدك مذيع قد الدنيا
وانا بقول حاسس بجو ألفه عجيب ليه
لاني بموت ف أبله فضيه وممكن اكون اتكعبلت ف صوتك عبر الأثير أصلي عشت طفوله متأخره شويه
----
كــ بديل للطب
طب وليه ما يمشوش مع بعض
--------
محطه الكليه عندك حق تماما فيها انا نفسي اتقرصت من ده مع بنت كانت بتعاملني عادي بس حضرتي حسيت انها معجبه فحبتها خبط لزق كده
بس كنت جنتل ف التعامل رغم أي شئ
---
موقف الحضانه دلوقتي بس عرفت ان هما مش بيضحكوا علينا ف الأفلام لما البنت بتعيط وتمسك ف جلبيه امها
-- اااااه
مستني المحطه الرابعه
شكلها تبع البايو تكنولوجي
سلام وكوني بخير

EMMY BABY said...

سفرووووووووووووووتة

بجد بستمتع وانا بقرالك رغم انى عارفاكى كويس بس وانا بقرالك بستمتع برضه

عجبتنى اتوى محطة الحضانة وخاصة الحتة بتاعت انا بس اللى ليا ماما وبابا

((:

اما تالت محطة فهى بتبقى تغيير فعلى فى حياة المعظم مننا

عالم تانى ناس كتير شخصيات مختلفة اعتماد كامل على نفسك وحاجات كتير جدا مختلفة بتخلى الانسان غصب عنه يتتغير

تحياتى

ايمى

احلي حياة said...

جميل ااوووي...بس انا مش عرفة ازاي فكرة اول يوم في الحضانة...يمكن عشان كان نقلة كبيرة في تفكيرك ان الدنيا دي مفهاش غير انتي ومامتك وبابكي
الاذعةو التلفزيون حلو جدااا استمري والله هيبقي كويس...لو حبة مثلا انك تعملي برنامج او انك تبقي مذيعة في fmمثلا والله هيبقي حاجة كويسة لو عندك الموهبة
بالنسبة بقي للكلية..فانا مستنية المحطة دي...وربنا يستر وتنفعني ومضرنيش
واكيد طبعا مش كل الولاد ينفع تكلميهم لان في بعضهم ميعلم بيهم الا ربنا...انا لما رحت قدمت اتعرفت علي اتنين..ولد وبنت...بس والله سعدونا جاامد..بدل مانقف كتير مشونا علطول..وطبعا مش بقول اني خلاص بقي هصحبة وبتاع...لا هو مجرد مصلحة يعني..سلام ازايك عامل اية...لما احتاج حاجة..اكتر ناس تخدمك الولاد...يعني خدي منهم الجدعة..وخلي علاقتك بيهم محدودة..فده اللي نفسي اعمله
وربنا يستر
والموضوع حلو اوووي..واحنا في اتنظار المحطة الرابعة

Tamer Alhosiny said...

عزيزتي نوري

طبعا كل محطة احلي من التانية

المحطة الاولي
-----------------

قعدت اضحك قوي لما عرفت انك عيطي لما لاقتيهم بيعيطوا
طبعا تخيلي في سفاريت صغيرين متجمعيمن في مكالن واحد وبيعيطوا يبقوا هيعملو فيهم ايه في الحضانة
اكيد ابو رجل مسلوخة وامنا الغولة
هيجوا كمان شوية
ههههههههههههههههههههههه

المحطة الثانية
----------------------
هو انتي في يوليو 2002
كنتي لسة طفلة وبتطلعي في برامج الاطفال
هههههههههههههههه
سفروتة بقا
طبعا انا للاسف مش سمعت صوتك
قبل كدة بس مين عارف
انا في الوقت ده كنت بسمع البي بي سي وراديو منت كارلو
وبسمع في البرنامج العام
الحجات السياسية فقط
ده غير برنامج علي الناصية
بس بيني وبينك كنت بسمع في السر ابلة فضيلة
بس اوعي تقولي لحد
ههههههههههههههههههههه

المرحلة الثالثة
----------------------
اهاااااااااااا
مرحلة الجامعة والعلاقات مع الاولاد
ههههههههههههه
واضح ان ليكي تجارب تستاهل تتسمع
لينا قاعدة في الموضوع ده
ههههههههههههههه

المرحلة الرابعة
--------------------

ده مش فضول ولا حاجة

بس ياريت تكتبي بوست عنها ولو من انواع البوستات بتاعتي
الاي الناس بتقرئها ومش بتفهم حاجة خالص
هههههههههههههههههه

تحياتي ليكي يا نوري

تامر الحسيني

قلب مصرى said...

جميل أن يتذكر الإنسان المحطات الجميلة فى حياته
جواكى شخص جميل فعلا
وعلى فكرة مش كل الولاد وحشين كده

فارس بلا جواد said...

أزيك يا سفروته
باتفق معاكي ان كل واحد ليه محطات مهمة في حياته زي اللي ذكرتيها
وبمناسبة كلامك أنا كنت باحب اسمع ابلة فضيلة قوي زمان وأنا صغير ولحد دلوقتي والله بس ظروف الشغل بقي
والتلات محطات اللي ذكرتيهم اكيد اثروا في حياتك واتعلمتي منهم حاجات كتير فعلا زي ما قلتي في الاخر
بالتوفيق دايما وتحياتي

مواطن زهقان said...

سفروته
والله بجد الواحد اتمتع وهوه بيقرا مغامراتك
م الحضانه للتيلفزيون للجامعه

بجد ابدعتى

mohamed hesham said...

ما زال أمامك الكثير من المحطات التي ستغير الكثير في تفكيرك وطريقتك ...

بالذات المحطة القادمة ...

والسـ ختام ــلام

smilyrose said...

عزيزتى نورى

بجد مراحل أجمل من بعضها

الأولى فى البداية وخطواتك الجميلة للحضانة

أول يوم دا بيبقى رائع وخصوصا تجمع لكل الصغيرين ههههههه

تانى مرحلة فى 2002 كنت صغيرة قوى يا نوران

سفروته جميلة جدا

الثالثة فى الجامعة

على فكرة كل اللى كانوا فى مدارس للبنات

انصدموا نفس الصدمة وعلى فكرة كنت مثلك

بس كنت بتعامل معاهم بتلقائية وبعدين بقيت اتعامل معاهم

كأنى ولد بس بكلمتى مش بحاجة تانية

رابع محطة ان شاء الله

هتكون أجمل محطة فى حياة السفروته الصغيرة

Smilyrose
وردشان سابقا

bastokka طهقانة said...

ربنا يوفقك دايما في محطاتك و يسعدك

و مشتاقة اسمع اخبار المحطة الرابعة


اوروفوار

المدون / أحمد كجول said...

السلام عليكم
بعد التحية و السلام نفيدكم علما بأن مدونة
شباب الصحبة
بدأت المرحلة الاولي من العمل و نحن نقدم الان أجرأ و أكثر المقالات التي تتنوع ,, نرجو منكم المشاركة من جديد ابداء الرأي علي المواضيع وبدأ التعليق ,, كما أرجو المشاركة في الاستفتاء

دة أمل ليا و شرف ,, انا حكون سعيد لو تمنحهولي

مجهود أكثر من 5 شهور ينتظر أجابة فرد

و جزاكم الله خيرا علي كافة الاحوال
http://so7bah.blogspot.com/


و يريت تكلميني علي ميلي
mrshawaah@yahoo.com
علشان موضوع مهم

enjy said...

اول مرة اجى هنا بس حلوة المحطات وبعدين لايقة على الاذاعة والتليفزيون وكدة ....... اسلوبك حلو يا نوران والله

سفروتة said...

السلام عليكم جييراني المدونين

نعتذر عن هذا الاختفاء المفاجئ بس كله بسبب النت اللعين

.........................

ساجي
......

ربنا يخليك يا مصطفي ..بجد كلماتك اخجلتني

_________

اه يا سيدي شفت انا تبع برامج الاطفال
ههههههههههههههههههههههههههههه
وبابا مذيع في اذاعة البرنامج العام

علي فكرة انا كمان من محبي ابلة فضيلة واخدت فترة كبيرة يجي 3 شهور بحالهم اسمعها كل يوم متواصل لان قبلها كان بيتذاع مسلسل للطفال برضه وكنت انا اللي بغني اغنية التتر وكنت بمثل فيه كمان

ـــــــــــــــ
انا اقصد ان العمل كاعلامية ممكن يكون بديل للطب لكن التمثيل مش هيبقي بديل الاتنين هيمشوا مع بعض عادي جداااااااااا

ــــــــــــــــــ

اممممممممممممممممم

اتقرصت؟

طب حاسب بقي بعد كده

ـــــــــــــــــ

هو البنات بس اللي بيعيطوا في الحانة يا مصطفي؟؟؟

الولاد كمان كانوا بيعيطوا

ـــــــــــــــــــــ

ههههههههههههههههههههههههههههههه
لا يا مصطفي ظنك عن المحطة الرابعة مطلعش في محله هي محطة ملهاش دعوة بالبيوتكنولوجي ...البيوتكنولوجي ممكن تقول عليها المحطة الخامسة السادسة السابعة وقت ماتيجي بقي ان شاء الله

ـــــــــــــ

شرفت بمرورك الكريم يا مصطفي

دمت بكل خير

سفروتة said...

emmy baby
..............

ايمي صديقة العمر

ربنا يخليكي يا بنت انتي ....قلنا مليون مرة بكسف

ههههههههههههههههههههههه

ـــــــــــــ

انا بس اللي ليا ماما وبابا ده كان بجد اعتقاد غريب اوي عندي بجد كنت بحس ان الناس كلهم معندهومش ماما وبابا معرفش ازاي

ههههههههههههههههههههههههههههه

ـــــــــــــــــــــ

تالت محطة انتي بجد قلتي الكلمات اللي كنت عايزة اعبر عنها بس معرفتش

مش بقولك احنا واحد يا بنتي

ـــــــــــــــ

يارب تفضلي علطول منوراني كده ...ومتحرمش من طلتك عليا

:)

سفروتة said...

احلي حياة
...........

فعلا يا مومو هي المحطة الاولي كانت نقلة بالنسبة لي عشان الاعتقاد اللي كان سائد عندي ده

ـــــــــــــ

لالالالالالالالالالالالالالالالالالالالالالالالالالا

ايه انا الاذاعة دي بالذات FMمبحبهااااااااااااااااااااااااااااش مش عارفة بيني وبينها تار كده

ــــــــــــــــــ

عندك حق في دي مش كل الولاد ينفع نكلمهم طبعا ...بس هي كانت مرحلة كده وبعدين الواحد اتعلم ...في نوع خدوم زي اللي اتعاملتي معاهم لما رحتي تقدمي الورق بس ده مش معناه اننا نتساهل في المعاملة معاهم

.....

شرفتيني يا مومو ومتحرمش من زياراتك

سفروتة said...

tamer alhosiny
..................

ربنا يخليك يا تامر

ــــــــــــــ

هههههههههههههههههههههههههههه

لا كان عندنا اوضة الفيران بدل ابو رجل مسلوخة...والله كنا بنترعب اول لما نسمع كلمة اوضة الفيران دي

ههههههههههههههههههههههههههههههه
عيال بقي
ــــــــــــــــــــــــ

معلش مسيرك تتكعبل في صوتي ....هو يعني احنا شوية في التمثيل
هههههههههههههههههههههههههههههه

بهزر بهزر

والله انا مكنتش اعرف ان ابلة فضيلة عاملة الجو الجامد ده ...ربنا يديها الصحة

بس واضح انك اذاعي ممتاز

استمر استمر

ـــــــــــــــــــــ

هههههههههههههههههههههههههههههههه

قعدات ايه بقي اللي انت عايز تسمعها دي

ده انا غلبااااااااااااااااااااااااااااانة

ــــــــــــــــــــــ

للاسف انا مش متمكنة زيك كده في الكتابة بالرمز ...فلما يبقي يجي وقتها هكتبها علانية احسن
هههههههههههههههههههههههههههههههه

ولا انت رأيك ايه
ــــــــــــــــــــــ

دمت بكل ود

سفروتة said...

قلب مصري
............

نورتني بزيارتك الكريمة

ربنا يخليك

بس علي فكرة انا مقلتش ان كل الولاد وحشين....بس هما كده معظمهم عندهم انطباع غريب اوي عن البنات ...لكن في طبعا فئة محترمة جداااااااااااااااااا واتعاملت مع الفئة دي برضه....بس دايما التعامل بيكون له حدود

شرفت بمرورك

:)

سفروتة said...

فارس بلا جواد
.................

ازيك يا فارس

انت كمان بتسمع ابلة فضيلة

مش بقولك واضح ان ابلة فضيلة عاملة جو جامد جدااااااااا مع الشعب

هههههههههههههههههههههههههههههه

نورت المدونة يا فارس

:)

سفروتة said...

مواطن زهقان
..............

والله بجد انت كمان يا مواطن نورت المدونة

ربنا يخليك

:)

سفروتة said...

mohamed hesham
..................

ازيك يا محمد

(بالذات المحطة القادمة ... )

ههههههههههههههههههههههه

واضح اننك عندك الحاسة السادسة

انا فعلا اشعر ان المحطة الجاية دي هتغير كتير من حياتي ان لم تكن هتغيرها كلها

تحياتي ليك

:)

سفروتة said...

smily rose
.............

دايما منوراني يا روز

معاكي كل الحق في اللي قلتيه عن المحطة التالتة

تحياتي ليكي

:)

سفروتة said...

baskotaطهقانة
...............

نورتي المدونة بالزيارة الجميلة دي يا طهقانة

ربنا يخليكي يارب


اما تيجي المحطة الرابعة هبقي اقولكم عليها ان شاء الله

شرفت بمرورك

اوروفوار

:)

سفروتة said...

المدون احمد كجول
.................

حاضر يا فندم هزور المدونة ان شاء الله

سفروتة said...

enjy
.......

ربنا يخليكي يا انجي

نورتيني بجد

بس علي فكرة دي مش اول زيارة

دي الزيارة التانية

بجد سعيدة بوجودك

تحياتي ليكي

:)

عبدالهادى_سارة said...

مش عارفهاقلك اييه..بس انا اكبر غلط انى معرفتش مدونتك من زمااان
لانها بصراحه اكتر من رااائعه واكت من جميييله
صح دي اول زيارة بس هتلقيني هنا
علطووول...باذن الله

.....

اما محطاتك دية ..فكل واحده احسن من التانيه

وحكاية الكليه دية
فصلا اي ولد بيشوف البنت على انها ..من الجنس الاخر ..والبنت كذلك سدقيني حتى لو اقنعتى نفسك باي حاجه ..هتحسي بكده

بس اي بنت بتثبت نفسها ليهم..بطريقة تعاملها ..انتى على قولتهم اديهم العين الحمراء خلاص يقفوا
وياويلك لو اديتيهم صفراء لانهم ما بيسدقوا ويخشوا طوااالي

........
اما عن اذلاذاعه ..فجميييل انك رحتي هناك وشفتى ناس جديده ..الاعلام حاجه حلوة ..حطي تحتها خطوط حلوة دية ...بس اما يكون في الخير ..حطي تحتهم بقه الاتنين ..حلوه بس في الخير ..حطي عشر خطوط
...
واللي شفتيه عنهم فده اعتقد العادى..ان الستات تبوس الرجاله ..واللبس القصير ..بقلك في ودنك(اصل دية الحرية ) الحرية انك تقلعي هدومك ....مش ده كلامهم برده -والله زمن العجائب- 0

ربنااا ينتقم منهم ومن الي بيروج للهبل ده

وربنا يوفقك للخير وينورلك طريقك

القلب الطيب said...

الله البست ده جامد اوى على فكرة
ربنا معاكى ويارب تكون الموضيع اللى جايه كلها تكون جامده كدا
تحيـــــــــــــ لكى ـــــــاتى



القلب الطيب



بست وشز فور يو

مووون said...

الســـــــــــــــلام عليكم
مساء الخير يادكتورة
يااااااااة
موضوعك فكرنى بالذى مضى
أيام الحضانة و....
بس حضرتك موضوعك ممتاز واسلوبك اجمل
وعندك حق فى اللى طلعتى بية من محطاتك
وإحنا فى انتظار المحطة الرابعة

abo salah said...

بعد السلام عليكم

بساطتك وتلقائيتك فى السرد هما أكثر ما امتعانى

تقريبا محطتك بتاعت الإذاعة والتليفزيون أنا كمان عشتها
بس مش ناحية برامج الأطفال
هههههههههههههههههه

ولكن من ناحية دهشتى بالعالم العجيب دا
بجد تحسى ان بره عالم وجوا عالم تانى
اول مرة دخلت برضه
استغربت ايه الناس دى كلها
ناس رايحة وجاية واللى ماسك ورق واللى ماسك شرايط
وليلة كبيرة
واكتر حاجة استغربتلها زى ما انتى قولتى
تلاقى اماكن نضيفة جداااااااا تحسى كأنك فى مدينة الانتاج الاعلامى
وعلى النقيض تلاقى اماكن تحسسك انك ماشية فى الاحياء الشعبية ولا كأنك فى مجمع التحرير

أجمل ما فيكى انك الحمد لله طلعتى من كل محطة بحاجة جديدة اتعلمتيها

ربنا يجعل محطات حياتك كلها خير وتعلم وحب وتفوق

تحياتى
وكل سنة وأنتى طيبة وأسرتك كلها بخير
وإلى الله أقرب

blue-wave said...

يااااااااااااااة
وحشتينى بجد
واسف على تقصيرى فى الزيارة يا احلى سفروته
وانتى يا وحشه مش بتزورينى ليه؟
اتمنى تكونى بألأف خير

دكتور بهــدوء said...

ياااااااه
لو كنت اعرف انتي في اي برنامج
كنت اتفرجت
وعؤبال المحطه الرابعه
اكيد اما تتخرجي
ولا تقصدي حاجه تانيه
وش رافع حواجبه وبيستعبط
بس هوه باباكي مذيع ف ايه؟؟؟؟؟

زى الهوا said...

وحشاااااااااااااااااااااااااااااااااانى ياسفروتة , وايه كل الذكريات دى , تصدقى شجعتينى انى اكتب بوست ذكرياتى انا كمان , اشمعنى انتى يعنننننننننننى

عمرو وجيه said...

الله عليك يا نوران


أسلوب شيق


اول مرة من فترة أقرى بوست من غير زهق


تلت محطات مهمة جدا لانهم حقا محطات مفصلية وحورية فى حياة أى شخص

..............................

المدرسة او الحضانة هى الانتقال من دائرة صغيرة إلى دائرة أوسع

..............................

الأذاعة هى غلبة الموهبة على الدراسة

بجد من رأى لو تقدرى تكملى بعد الكلية فى الإذاعة كملى ....

................................

الجامعة

انا عن نفسى كانت محطة كبيرة جدااااا وأخدت فترة على التأقلم عليها

................................



تحياتى لك على أسلوب السلس الرائع


.....


و كل سنة وانتى طيبة


و رمضان كريم

سفروتة said...

اولا : كالعادة لازم اعتذر عن التأخير بس والله النت بيعملها معايا

عموما حصل خير ...اديني رجعت تاني اهه

وهشوف المدونات كلها باذن الله

........................

عبد الهادي_سارة
..................

اعتقد ان سارة هي اللي كاتبة التعليق؟؟؟

طيب ...ش مشكلة

________________________


ربنا يخليكي يا سارة علي كلامك الجميل ده

وعندك حق في اللي قولتيه عن المحطة التالتة

_______________________

اما مبني الاذاعة والتلفيون فده مبني المتناقضات ...تلاقي الحشمة والخلاعة في مكان واحد

ربنا يهديهم يارب


شرفت بزيارتك الجميلة

ويارب تتكرر

تحياتي

سفروتة said...

القلب الطيب
...........

اشكرك علي زيارتك الكريمة

نورت المدونة

تحياتي

:)

سفروتة said...

مووون
.......
وعليكم السلام ورحمة الله

منورة المدونة في اول زيارة ويارب متكونش الاخيرة

ومتشكرة اوي لكلامك الجميل

ربنا يخليكي

واكيد ان شاء الله هتكلم عن المحطة الرابعة

تحياتي ليكي

:)

سفروتة said...

ابو صلاح
........

بعد وعليكم السلام ورحمة الله

ربنا يخليك يا ابو صلاح

بجد يا جماعة بتخجلوني بكلامكم الجميل ده

تعرف يا ابو صلاح تعليقك ده يعتبر الدليل التاني لتأكيد كلامي عن مبني الاذاعة والتليفزيون ...بجد عالم غريب في كل شئ ويمكن انا قلت في تعليق فوق انه مبني المتناقضات لانه فعلا كده

شكرا ليك يا احمد
ويارب دايما منورني

وانت بالصحة والسلامة

تحياتي

:)

سفروتة said...

blue-wave
.............

اهلا يا دوك
منور والله
ايه الغيبة دي
معلش انا مقصرة في الزيارات ...بس هو النت بعافية اليومين دول

شكرا ع السؤال

تحياتي

سفروتة said...

دكتور بهدوء
................

اهلا بأهدي دكتور في العالم

وبعدين يا دكتور اسمها كنت سمعت مش اتفرجت

هههههههههههههههههههههههههههههه

انا كنت في برامج الاطفال في الاذاعة

اما المحطة الرابعة فهي الوش اللي رافع حواجبه وبيستعبط
ههههههههههههههههههههههههههههههههههههههههههههههههههههههههه

بابا يا سيدي يبقي "حسن مدني" مذيع في اذاعة البرنامج العام

تحياتي
:)

سفروتة said...

زي الهوا
..........

موحاااااااااااااااااااااااااااااااااااااااااااااااااااااا

والله يا بنتي انتي كمان ليكي وحشة كبيرة والله

يللا يا ستي شفتي بقي ...فكرتك انا بالذي مضي وانقضي

هههههههههههههههههههههههههههههههههههههههههههههههههه

مستنين بقي البوست الذكرياتي ده ان شاء الله

منورة يا سكرة

:)

سفروتة said...

عمرو وجيه
..........

المدونة نورت يا عمرو والله

___

متشكرة جدااااااااااا علي كلامك الجميل ده

_______

اما عن الاذاعة فبجد مش عارفة هل ممكن اكمل فيها ولا لأ

وانا معاك في حكاية ان الجامعة كانت فعلا تعتبر اكبر نقلة في حياة الواحد ..وانه فعلا اخدت فترة عشان اعرف اتأقلم واحدد الاسلوب اللي هتعامل بيه

تحياتي ليك يا عمرو

ويارب دايما منورني

:)

romansy said...

كل سنة وانتى طيبة
المدونة جميلة فعلا
وتحفة ورقيقة قوى
بس انتى كدة رجعتى الواحد
سنين كتير ورا
ايام ابلة فضيلة

سفروتة said...

romansy
..........
وحضرتك طيب يا بشمهندس

ربنا يخليك

ده بس من ذوقك

نورت المدونة

ويارب تنورها علطول

تحياتي

:)

norahaty said...

السلام عليكم ورحمة الله وبركاته
ياخبرابيض!!!!!!!!!!!!!
ياكرابنتس !!!!!!!!!!!!
انتى لسه فاكرة الحضانة ..الله اكبر
وبسم الله ماشاء الله
لانها فترة مؤلمة لكتير من الاطفال حتى بنسميها فى السيكترى (الفطام الثانى)لانها تانى اقسى تجربة فى حياة الطفل بعد الفطام الاول طبعآ
المهم انها عدت عليكى بخير وكمان فاكرة منها ذكريات جميلة
حلوة اووووووووووى
مواقفك وذكرياتك اللذيذة
وكمان متشكرة للزيارة
ويارب معرفة خير ومحبة
بس لىّ سؤال:
مين بابا؟
ايوة صحيح قبل ما أمشى
منتظرين الموقف الرابع
ماتتأخريش علينا
فلا احب الانتظار
تحياتى ودعواتى

سفروتة said...

norahaty
............
منورة المدونة يا دكتورة بجد

سعيدة اوي بزيارتك ليا

هههههههههههههههههههههههههههههههههههههه

شفتي بقي كنت طفلة غريبة ولسة فاكرة مواقف كتير من لما كنت في الحضانة

..........

بابا يبقي "حسن مدني" مذيع في اذاعة البرنامج العام


ان شاء الله المحطة الرابعة نتكلم عنها ..ربنا يسهل بس

تحياتي يا دكتورة

دمتي بكل ود

:)

Dr.A.S. black armor said...

لما قريت اسم البوست ماكنتش عارف انك هاتتكلمى عن نفسك
بس لما قريت البوست نفسه حسيت بالفة غريبة
وخصوصا فى موضوع الحضانة والمدرسة لانى تقريبا مريت بنفس الظروف
كلامك سلس قوى وطالع من قلبك فعلا علشان كدة بيوصل لينا بسهولة
اما بالنسبة للمحطة الرابعة فممكن نخمنها لحد ماتقولى عليها
رمضان كريم وربنا يكتر من محطاتك

شيتوس الاهلاويه اووووي said...

بجد ذكريات جميله اوي
احسن حاجه ان الواحد يقعد يفتكر ذكرياته وكل مواقفه الجميله واللي كان عبيط فيها واللي كان جامد فيها وكل حاجه ههههههههههه
بس بجد انتي بنوتة زي العسل ودمك خفيف وبسيطة جدااا
كل سنة وانتي طيبة وتقبلي مروري في اول زياره ليا عندك في مدونتك اللذيذة دي
دمتي ساااااالمة ورمضان كريم
أختك شيتوس

كريم بهي said...

مدونتك هايلة
ومحطاتك احلى
وبوست جميل
وباين انك كنتى طفلة شقية وجميلة

انا هارجع ازورك تانى
بس حبيت اسجل اعجابى بصمتك الجميل دا

كريم بهي
شاعر

تحياتى

Tamer Alhosiny said...

ايه يا نوري اين انتي
معقول بقالك 3 اسابيع بدون موضعات جديدة
طيب يا سيتي انا دبستك خلاص
وبرده ليكي
لانك ادتيني اول تاج
اتفضلي بقا تاجين مرة واحدة

تامر الحسيني
انسان عاشق حر

dalia said...

نوران
كل عام وانتي بخير ورمضان كريم مدونتك جيدة ودمها خفيف جدا جدا دروس مهمة بس الواحد مشتاق لمعرفة المحطة الرابعة دعيني اخمن ربما داخل المعمل

سفروتة said...

dr.a.s black armor
....................
ربنا يخليك يا دوك

بس يارب اكون فكرتك بذكريات كويسة في الحضانة والمدرسة

نورت المدونة في اول زيارة ويارب متكونش الاخيرة

وكل سنة وحضرتك طيب

تحياتي
:)

سفروتة said...

شيتوس الاهلاوية اووووووووي
..........................
عندك حق يا شيتوس الواحد لما بيفتر مواقف من زمان بيفضل يضحك اوي وفيه مواقف بيفضل يقول ياريتني ما اتحطيت فيها ..ومواقف بيفتخر بيها...وووووو

منورة المدونة يا شيتوس بجد

وانتي كمان باين عليكي بنوتة لذيذة

يارب تنوري حبة صمت دايما

دمتي بكل ود

ورمضان كريم

:)

سفروتة said...

كريم بهي
.........
ربنا يخليك يا كريم
ده بس من ذوقك

منتظرة زيارتك الجاية ان شاء الله

نورت المدونة

تحياتي
:)

سفروتة said...

TAMER ALHOSINY
...................
ليه كده بس يا تامر
حرااااااااااااااااااااااااااااااااااام

...
بس بيني وبينك جم في وقتهم اهه نسد خانة
لحد اما اكتب موضوع جديد

متشكرين يا فندم

واضح ان المدونين بيعزوني اووووي
ههههههههههههههههههههههههههههههههه

تحياتي
:)

سفروتة said...

DALIA
........
وانتي بخير يا داليا

ربنا يخليكي يارب

بس انا مش هقول ع المحطة الرابعة دلوقتي

هسيبكم تخمنوها

ولما تيجي اكيد هقولها ان شاء الله

دمتي بكل ود

:)

romansy said...

سفروتة بعد كل هذة المحطات
اقبلى منى سيلا من الطلقات
وخذى احلى التاجات
رومنسى

سفروتة said...

romansy
............
طب اعيط
لا انا شكلي هعيط فعلا
اعيط ايه بس...انا مت اساسا من الرصاص اللي اتحدف عليا
اعااااااااااااااااااااااااااا
ماشي يا رومنسي
مكانش العشم
مسيركم تدبسوا معايا
(وش شوريييييييير)

ليكوريكا said...

كل سنه وانتي بخير

فين جديدك

انا قريت الموضوع ده من زمان وكنت فاكر اني علقت

بس واضح ان الزهايمر خلاص جالي رسمي

عموما عقبال المحطه الرابعه

ومستنيين البوست الجاي

ليكوريكا

سفروتة said...

ليكوريكا
...........
انا هنا يا ليكو
الجديد جاي باذن الله
ومتشكرة جداااا ع السؤال
كل سنة وانت طيب
ورمضان كريم
:)

مـجـنـووون said...

السلام عليكم

كلام جميل وأحساس رقيق ، ومحطات جميله خلتني أفكر أيه إلي حصل منها في حياتي

أنا ممكن أفتكر كل حاجه ، بس فترة الحضانة دي مش قادر أفتكرها ، مش علشان كنت صغير ، ولكن علشان أني أصلا مرحتش حضانه ههههههههه ، كان علي أيامنا فيه كتاب

تقبلي جنوووني
مجنووون

كيارا said...

بصراحه انتي زي العسل
واسلوبك بجد قريب ليا اوي وبحسه اوي

ربنا يحققلك احلامك ويسعدك يارب

حلوه الدعتين دولا :)

سفروتة said...

مجنووووووووووون
...............

يا اهلا يا اهلا حضرتك اساسا منور من غير تشريف لانك في بيت المجانين اصلا

ههههههههههههههههههههههههههههه ليه مش علي ايامكم كان فيه حضانة؟؟؟ ....تعرف حسستني انك من ايام محمد علي

نورتني بجد في حبة صمت
واتمني دوام التواصل

تحياتي
:)

سفروتة said...

كياراااااااا
..............
اهلا كيارا
وانتي والله باين عليكي زي العسل
علي فكرة الدعوتين دول بجد حلوين اوي
فعلا محتاجاهم في التوقيت ده
ربنا يخليكي يا كيكو
واتمني تنوريني علطوووووووووول

تحياتي
:)

will said...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣商品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣,情趣商品,自拍,UT聊天室,聊天室,豆豆聊天室,哈啦聊天室,尋夢園聊天室,080聊天室,080苗栗人聊天室,H漫,A片,AV,AV女優,A漫,免費A片,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,SEX,微風成人,嘟嘟成人網,成人,18成人,成人影城,成人圖片,成人貼圖,成人圖片區

情趣用品,情趣用品,情趣,情趣,情趣商品