Wednesday, February 13, 2008

حبة تفااااااااااااؤل

خلاص انا رجعت تاني نوران المتفائلة اللي دايما بتضحك وتهزر وفكيت التكشيرة والحمد لله
اصل اللي حصل ايه؟
بصراحة انا كنت مضايقة قوي يوم لما النتيجة ظهرت وكنت خلاص عايزة اولع في اي حاجة ان شاالله الكلية حتي
المهم تاني يوم الصبح صحيت من النوم وقمت اغسل وشي لقيت خير اللهم اجعله خير واحد بتبصلي في المراية وبتقوللي:
ايه يا نور انتي هتفضلي مكشرة كده وزعلانة لحد امتي يا بنتي اللي حصل حصل وبعدين لسة في حاجة اسمها الترم التاني وبدل البايو في ميتابوليزم يعني هتعوضي فيه ان شاء الله وتجيبي درجة اعلي من درجة البايو بكتييييييييييييييييييييييييير.....انتي بس كده شدي علي نفسك الترم ده وذاكري كويس عشان تبقي دكتورة ممتازة ...واوعي تاني مرة اسمعك بتقولي لنفسك انك فاشلة هزعل منك وهخصامك ومش هكلمك ...ركزي انتي بس دلوقتي وشوفي انتي قصرتي في ايه الترم اللي فات وعوضيه الترم ده
وبعدين لقيتها بتبتسم كده ابتسامة جميلة...بس ساعتها كنت خلاص تلجت اصل الميه كانت ساقعة اوي ونسيت اولع السخان
وبس
وانا اسفة يا جماعة بجد اني غميتكم وباعتذر لاي حد دخل هنا وكشر اول ما قرا الكلام بتاع البوست الي فات
اصل انا بصراحة بطلع كل الغل اللي جوايا يا اما علي الورقة او المدونة ووقتها كانت المدونة هي اللي قدامي
انا دلوقتي في تحدي مع نور عشان اقدر اوصل للي انا عايزاه ان شاء الله
وهبقي ازور عالم النت ده مرة في الاسبوع يا اما الاربعاء او الخميس
سلامو عليكو

7 comments:

ابن حـجـر الـعـسـقـلانـى said...

و الله أنا كنت سعيد إنك تجاوزتى الحالة اللى كنتى فيها .. و فضلت سعيد لغاية ما قرأت الكلام دة:"البايو في ميتابوليزم"ا

لقيت نفسى اتنرفزت .. و حرارتى عليت .. و عينى احمرت .. و ودانى ازرقت .. و شعرى شاط

ماهو أنا ممكن أقبل أى حاجة إلا إن حد يغصبنى إنى آكل حاجة أنا مش عايزها

أنا نبهت على أمى ميت مرة إنها ما تعملش "ميتابوليزم" و خصوصا لو كان فيه "بايو" ... أقوم آجى الاقيكى عاملاه ... أزعل أنا كدة بالتأكيد


و يا ستى الحمد لله إنك بقيتى بخير ... و مستنيين موضوعاتك

bota said...

السلام عليكم

اول مره اجي هنا وكويس اني جيت لقيتك عرفتي ان الانسان ميستسلمش للكآبه
ولو حط هدف لحياته وكان مقتنع بيه صدقيني هيحققه

ربنا يوفقك
ان شاء الله الترم التاني يكون احسن

s@gi l'ombre said...

السلام عليكم
نفسى الاقى القمور اللى ينطلى ف المرايه ويقعد يقلى يا ساجى انت موش فاشل
انت هتذاكر انت دكتور ناجح ومتميز
وأفلامانات كده
بس واضح انهما اغتالوه فى اتفاقيه الخنقه المعتبره ضد شخصى الموقر
سيبك انتى الحمد لله انك بخير
والميتابولزم ده اصعب شويه بس ان شاء الله هيعدى فله وانتى قدها وقدود
سلام ومستنين بوست الجمعه الجايه
هشششششش

زى الهوا said...

لولولولىىىىىىىىىىىىىى , الحمد لله انك بقيتى تمام ومتفائلة , عايزين بقى بوستات تنططنا من الفرح , مش عايزين حزن وكآبة تاااااانى , يارب ديما متفائلة ياستى وابعد ياحززززن بعيد عن نووووووووووووورى

keda-sponsor said...

لازم كل واحد يكتأب علشان يفرح ... و إلا يبقى الفرح مالهوش معنى

يعني المتناقضات تبرز بعضها ... بس حلو قوي موضوع المرايه ... أنا دايما لما أبص في المرايه أحس أن وشي بيبصلي بخباثه معرفش ليه

بالنسبه للنتيجه ... متزعليش أنا سمعت أنها كانت مشرحه على كل الناس ... مفيش حد نجح من دفعتكم غير مهند حيدر ... اناعارفه .. دحيح من أيام المدرسه .... مش انت في تانيه برضه ؟


سلااااااااااااااام

الباحث عن الحقيقة said...

خيييييييييييير
كله خير ان شاء الله
بس انتى شدى حيلك وانا اخلى ابو العساقيل يجيب الساقع لغاية الشارع
وابقى انزلى انتى بقى شيلى وطلعى لغاية الشقه
هههههه
بالتوفيق

noury said...

متشكرة ليكم كلكم يا جماعة

وبجد انا مش عارفة اقولكم ايه

الكلام عاجز عن التعبير

ربنا يخليكوا للغلبانة اللي اسمها نوران

ودايما كده تفكوا ازماتها