Wednesday, December 31, 2008

نظامِك ايــــه؟؟؟؟



يا تري هتفرقي ايه عن اللي قبلك
نفس اللي بيحصل كل يوم هو هو
الفرق بس في التواريخ



ويمكن الكوارث فيكي تبقي اكتر من اللي قبلك

مش نظرة تشاؤمية والله ...اطلاقا ...كلا البتة

بس ده الواقع



ناس بتحتفل بقدوم السنة الجديدة
وناس بتتقتل والارض تشهد علي دمهم مع بداية سنة جديدة
وناس مش في بالها اصلا ان احنا في بداية سنة جديدة

اتمنيت في 2008 تلات امنيات

اتحققوا اتنين وواحدة لأ

خير ...ربنا عايز كده


مش عارفة انا عايزة ايه من 2009

بس نفسي تبقي سنة هادية ...وان كنت اتمني المستحيل علي ما اعتقد



ومع بداية سنة جديدة ...احب اسألها واقولها



نظــــــــــامِك ايـــــــــــه؟؟؟

ــــــــــــــــــــــــــــــــــــــــــــــــــــــــــــــــ
بالمناسبة
امتحان البروتوزوا كان جميل جدا والشفوي بتاعه كان ثكرة
عندي بعد كده مناعة ...ربنا يعديها علي خير يااااااااااااااااااااااااااارب
دي مناعة يا ناس يعني تدعوا بقلب جامد ها؟؟؟؟
هههههههههههههههههههههههههههههههههههههه
ايون كده
يللا كل سنة وانتم طيبين

Sunday, December 28, 2008

Wednesday, December 24, 2008

Tsakot El Sha3r Phenomenon

زي ما في


Contact Inhibition Phenomenon*


وزي ما في


Anchorage Phenomenon**


اتضح انه فيه كمان


Tsakot El Sha3r Phenomenon


اي


ظاهرة تسااااااااقط الشعر


الحقيقة بقالي فترة ملاحظة حاجة غريبة في شعبي السفروتي وخاصة فئة طلبة كلية الطب البيطري جامعة المعز لدين الله الفاطمي


العيال شعرها بيسقط


وياريته حصل مع فرد واحد من افراد المملكة


لاااااااااااااااااااااااااااا


ده حصل تقريبا مع القطيع كله


قصدي الطلبة كلهم


معلش الدراسة بتحكم في الالفاظ شوية


بس والله الكلية فعلا بتعاملنا مش معاملة بني ادمين خالص ...زينا زي اللي بنعالجهم


المهم


اصدرت مرسوم ملكي صادر من الديوان السفروتي


علي ان يجتمع جميع علماء المملكة ويدوني تفسير واحد للي بيحصل


اصله حراااااااااااااااااااام المملكة نصها يبقي اقرع


يرضيكوا؟؟؟


والحقيقة العلماء بتوعنا مقصروش في حاجة


وبعتولي النتيجة اللي توصلوا اليها


ومختصرة ومفيدة واقتنعت بيها فعلااااااااا




بس الاول احب اشكر علماءنا وعلي رأسهم العالم الجليل ذو الرأي المتين صاحب الرؤي المتفتحة والخلايا العصبية النيرة والنظرة المستبعدة



ابو شعرة المنكوش

نتيجة الدراسة كانت كالأتي


بعد الفحص والمحص والتمحيص وجدنا انه جميع طلبة الطب البيطري يفقدون شعر رأسهم تدريجيا وذلك وفقا للمعادلة الاتية


معلومة واحدة في ورقة الاجابة= سقوط شعرة من رأس الطالب


وسقوط الشعرة لا يتعلق بخواصها الفيزيائية ولا الكيميائية وانما هو امر بديهي بسبب انتهاء العمر الافتراضي لها بمجرد سكب المعلومة في ورقة الاجابة


فريق علماء المملكة السفروتية

__________________________


خلصت امتحانات العملي النهاردة

الحمد لله عدت علي خير

اينعم عكيت شوية في الباثولوجي

بس الباقي كان حلو

واستمتعت جداااااااااا بامتحان المناعة

ادعولنا بقي يا جماعة كده ربنا يكرمنا في النظري

MCQ وبالذااااااات في الـــ

ــــــــــــــــــــــــــــــــــــــــــــــــــــــــــــــــــــــــــــــــــــــــ

بالمناسبة الكلام اللي بالانجليش فوق ده من اثر امتحان الفيروسات فمتاخدوش في بالكم خاااااااااااااااااااااالص

وادعولنا علي قد ما تقدروا

Wednesday, December 17, 2008

خذوا الحكمة من فيه سفروتة

السعادة الحقيقية صعبة المنال ...وهي بحق تستحق المعاناة للوصول اليها

ده سنفور افندي

ــــــــــــــــــــــــــــــــــــــــــــــــــــــــ

ده مش عارفة اسميه ايه

تهييس ما قبل الامتحان

ولا فعلا انا اليومين دول حاسة بسعادة غريبة لاتوصف

ولا انا اللي بحاول امني نفسي بالسعادة

ـــــــــــــــــــــــــــــــــــــــــــــــــــــــــ

شمس النهار هتجيني
هتغني وتصحيني
غنوة امل وحياة
ولا عمري سمعتها
مع اول شوق هروق وهشوف حاجات كتير مشفتش زيها
عصفور جناحه حرير
هيطير لفوق ويطير
يحكيلي عن اساطير
ولا عمري سمعتها
مع اول شوق هروق وهشوف حاجات كتير مشفتش زيها
الكون هيضحك تاني
والنور هيستناني
اضحك خلاص يا زماني
ما الفرحة عرفتها


فرقة وسط البلد

Saturday, December 6, 2008

فرحة وعيد



سلام عليكم جميعا


كل سنة وانتم كلـــــــــــــــــــــــــــــكم طيبين يا أحلي مدونين


وعيد سعيد علينا يارب


ويارب نكون كلنا اجتهدنا في الايام اللي فاتت واستعدينا لبكرة كمان


ــــــــــــــــــــــــــــــــــــــــــــــــــــــــــ

:علي جنب

بشكر كل اللي سألوا عليا في غيابي

الحمد لله انا دلوقتي بقيت احسن بكتير

وكمان مش معقول يعني يجي العيد وابقي مكتئبة ومكشرة

عيش الحياة علي انها اللحظة الاخيرة

بحاول اعمل اي شئ كويس عشان ربنا يبقي راضي عني

ــــــــــــــــــــــــــــــــــــــــــــــــــــــــــ


كل سنة وانتم طيبين وبصحة وسعادة والف خير

:)

Wednesday, November 5, 2008

زي النهاردة

Remember remember the 5th of november
هذه الكلمات سمعتها منذ فترة ليست بالقصيرة في احد الافلام الاجنبية ...جذبتني تلك العبارة لروعة الاداء الذي قيلت به علي لسان بطل الفيلم
ولكنني لم اكن اتوقع انني بالفعل سأظل اتذكر الخامس من نوفمبر طيلة حياتي

ففي هذا اليوم
عرفتك ولن انساك

Sunday, September 14, 2008

كنت طيبة والله

ايها السادة
وردنا الان نبأ عاجل من مملكة السفاريت


تم اغتيال مليكتكم ملكة مملكة السفاريت (سفروتة هانم) وذلك بعد ان اطلقوا عليها الرصاص وأودوا بحياتها في الحال،وقد افاد مراسلونا من موقع الحدث بان السبب وراء وذلك هو ذلك الشئ المسمي بالتاج والذي تلقته مليكتنا المعظمة من ايمي بيبي والمبرمج المحترف وتامر الحسيني،وقد افادت مصادر البحث الاولية بان الذي اطلق الرصاص علي السفروتة هو المدعو تامر الحسيني وجار البحث عنه لاستكمال التحقيقات ،وقد عثر رجال الشرطة علي التاج المدمم وبجواره اجابات الملكة المعظمة قبل ان تعلنها للجميع

وتنفرد محطة
Safrota TV

بعرض اجابات التاج -والذي اكتشفنا انهما تاجان- علي السادة المشاهدين

التاج الاول
كان من ايمي بيبي وتامر الحسيني


بدأت تدوين امتي؟ ودخلت العالم ده ازاي؟

بدأت تدوين في شهر يوليو 2007 ،اما دخلته ازاي فده هتلاقوه في بوست السنوية بتاع المدونة
:)



ايه كان انطباعك في البداية؟

اول لما عملت مدونة "سكوب" كنت فرحانة اوي لاني حسيت اني بمتلك شئ خاص بيا علي الشبكة العنكبوتية وهعمل فيه اللي انا عاوزاه،وعرفت بعدها اني واجب برضه اشقر علي جيراني المدونين عشان يعرفوا مدونتي ...وهذا ما كان



مين اكتر واحد بتهتم بتعليقه علي بوستك الجديد؟
كل الناس اللي بتدخل عندي وتسيب بصمة جيدة في مربع التعليقات بستني انها تكرر زيارتها في البوستات اللي بعد كده
لكن حقيقي بستني دايما زيارة ايمي وليكو وابو صلاح وزي الهوا وعمرو وجيه ودكتور بهدوء
وبنشكح اوي وبفرح جداااااااااااااا لما بلاقي الاتنين اللي بيفصفصوا مواضيعي تامر وساجي
ايه اهم حاجة اتعلمتها من عالم التدوين؟
عرفت يعني ايه حب بجد...لما تكون في اسوأ حالاتك النفسية وتلاقي جنبك ناس خايفة عليك وعايزة تطمن عليك وتفرح لرجوعك تاني
اتعلمت اني احترم وجهة نظر الاخر لان كل واحد له فكره وثقافته المختلفة اللي المفروض اتفهمها واعبر انا كمان عن وجهة نظري وكل ده في اطار الاحترام
ايه اكتر حاجة كرهتها؟
الناس اللي تدخل وتسيب كومينت ملوش علاقة بالموضوع اللي انت كاتبه نهائي
الناس اللي بتدخل تشتم وتصرح بالفاظ بذيئة ، بس الحمد لله ده محصلش معايا
الناس اللي بتسيب كومينت وتقول فيه زوروا مدونتي،مبحبش كده خالص خالص
حاسس ان التدوين له اثر؟
علي المستوي الشخصي: يمكن اكون اتأثرت شوية لاني عرفت افكار مختلفة واساليب مختلفة ،بالاضافة الي اني اكتسبت ناس زي العسل وبجد روحهم حلوة وجميلة
اما المستوي العام: كنت قريت في مرة ان رئيس الوزاء علق في احدي المدونات في مرة ودي كانت فعلا حقيقة وده معناه ان المدونات لها صدي عند المسؤولين ،ويمكن في يوم من الايام نسمع عن ثورة كان اساسها المدونين
كمان سلسلة مدونات مصرية للجيب اعتقد انها هيبقي ليها تأثير قوي علي الناس بعد اما يبقي كل مواطن في ايده مدونات مش مدونة واحدة
التاج التاني
كان من المبرمج المحترف وكمان تامر الحسيني
اذكر خمسة احلام علي الاقل تحص ماضيك وتحلم فيها بتغيير اشياء ماذا ستعدل وماذا ستترك؟
حلمت اني اكون دكتورة اطفال واملي العيادة بتاعتي صور كارتون وبيبيهات ولعب جميلة وشيكولاتة وبنبوني عشان الاولاد الصغيرين يحبوني
حلمت اني اقدم برنامج طبق اليوم ....ههههههههههههههههههههههههههههههههه...كنت بجيب مواعين المطبخ كلها واحطها قدامي واتخيل نفسي بقدم البرنامج وساعات كنت بستعين بفوانيس رمضان بعد اما افها 100 حتة
حلمت اني امسك البيبت في المعمل زي ما كنت بشوف الدكاترة في معمال التحاليل في التلفزيون ....ومسكتها فعلا
كنت هموت والبس النضارة ..هههههههههههههههههههههههههههههههههههه .. واديني لبستها ومبقيتش اقدر من غيرها
حلمت اني الف الفضاء كله والف ع الكواكب كوكب كوكب واعيش في كل واحد شوية.....من كتر ما كنت بتمني الحلم ده كنت وانا نايمة بحلم بالشهب والنيازك...اه والله ...وفي مرة حلمت ان المريخ والارض اصطدموا ببعض وحصل انفجار رهيب...يمكن تستغربوا لو قلت اني لسة بحلم اني اروح الفضاء وبحرص كل شهر اني اقرأ مجلة العربي عشان الملحق بتاعها لازم بيبقي فيه مقالة او اتنين عن الفضاء واخر اخباره
اذكر خمسة احلام علي الاقل تخص مستقبلك
بحلم اني اكون اشهر واكبر باحثة في علم الجينات والهندسة الوراثية....ويبقي عندي اكبر مركز لابحاث الجينات في العالم
نفسي اوي اوي اوي اروح احج وازور قبر الرسول الكريم...حلمت بيه قبل كده بس مشفتوش شفت نور جاي من بعيد
اجيب عربية عشان اخلص من قرف المواصلات واللي بيحصل فيها، واجيب لاب توب
اكتب اول كتاب ساخر ليا....واول صفحة هتكون اهداء لاعز مخلوق عندي في الدنيا دي كلها
بحلم بالبيت الجميل الهادي اللي هيضمني انا والانسان اللي قلبي اختاره ويبقي عندنا بنوتة عسولة هسميها افنان وولد امور باباه بقي هو اللي يسميه
:)
اذكر شخصين علي الاقل متواجدين في حياتك حاليا كنت تود وجودهم قبل الان بزمن
حبيبة قلبي ايمي ....وتامر الحسيني
الاتنين دول اثروا في حياتي جاااااااااااااااااااااامد
اذكر شخصين علي الاقل غير متواجدين في حياتك كنت تود وجودهم الان او في حياة اولادك مستقبلا
هو واحد بس ... سيدنا محمد
بجد كان نفسي اوي اكون عايشة معاه وفي بيته وافضل اتعلم منه كل حاجة كان بيعملها
لمن تهدي هذا التاج
انا هكون رحيمة بيكم يا جيراني المدونين ومش هرخم عليكم ومش همرره لحد عشان متدعوش عليا
بس اللي يعجبه ياخده بالف هنا وشفا
اهئ اهئ اهئ
كأنها كانت حاسة انها هتموت ومحبتش تتعب حد وتخليه يجاوب عليه...نتي طيبة والله يا جلالة الملكة
نحيطكم علما ايها السادة ان الجنازة ستشيع من مسجد النور بالعباسية (ده في كوكب السفاريت مش هنا في مصر) بعد صلاة الظهر

Saturday, August 16, 2008

محطات نورانية

لكل انسان منا بعض المحطات التي تغير مجري حياته وغالبا يكون ذلك التغيير للافضل ..او بعض من المحطات التي تؤثر فيه بشدة وتترك اثرا في مخيلته لا ينساه ابدا وربما يجعل منه وقودا ليدفع عجلة الحياة للامام


تذكرت منذ فترة بعضا من تلك المواقف والتي بعدها وجدت ان نظرتي للحياة او ربما لحياتي انا شخصيا قد تغيرت بعدها



المحطة الاولي


اول يوم ليا في الحضانة

ــــــــــــــــــــــــــــــــــــــــــــ


طبعا هتقولوا ايه البت دي هي كمان فاكرة اول يوم راحت فيه الحضانة وبتقول عليه محطة في حياتها.....ايون فاكراه زي ما يكون كان امبارح ...تقريبا قبل ما ادخل الحضانة كنت فاكرة اني عايشة في العالم ده لوحدي انا وماما وبابا بس ..وان محدش تاني خالص عنده ماما وبابا زيي ..كان عندي بجد معتقدات غريبة كده...واول يوم رحت فيه الحضانة لقيت كائنات صغيرة زيي ولابسة نفس اللبس بتاعي وبيعيطوا بشدة رحت معيطة معاهم انا كمان ..بس ماما جات قعدت معايا شوية وبعدين مشيت ...ومن يومها وانا عرفت اني مش عايشة لوحدي في الكون ده ..والحمد لله قدرت اثبت نفسي للجميع وكان بيسند الي مهمات كتيرة جدااااا ...حفلات واذاعة مدرسية ومسابقات ..وحاجات كتير ..ومن اليوم ده تم اكتشاف مواهبي ..وبقيت معروفة علي مستوي المدرسة من الحضانة لحد اخر فصل في اعدادي


.......



المحطة التانية


يوم دخولي مبني الاذاعة والتليفزيون

ــــــــــــــــــــــــــــــــــــــــــــــــــــــــــــــــــ



كنت رايحة عشان امثل في برامج الاطفال ..الكلام ده كان في شهر يوليو سنة 2002

اليوم ده مش عارفة ليه كنت خايفة وعندي رهبة كده ...اصل بابا قاللي ان المخرجة هتقعد معاكي شوية وتعملك اختبار صوت واداء ..وانا مش بحب كده..ههههههههههههههههههههههههههههههههه ...المهم اول لما دخلت المبني من جوا ..حسيت اني شفت عالم تاااااااااااااااااااااااااااااااني خالص ،عالم غريب بجد ناس رايحة وجاية وطالعة ونازلة وشفت الممثلين والمذيعين بتوع التليفزيون ...وكل خطوة نمشيها جوة المبني الاقي حد وقف يسلم علي بابا ...لحد اما خلاص كنت هقف اتوماتيكيا بين كل خطوة وخطوة...وصلنا الدور الرابع ودخلنا استوديو 39 لقيت ابلة سهير المخرجة اخدتني بالاحضان وسلمت عليا بحرارة ولا كأنها تعرفني من يجي خمسين سنة...طبعا هي بكده ازالت كل الخوف اللي كان عندي..دخلت الاستوديو بتاع التسجيل وقالتلي امثل مع زمايلي دول ومن غير ما اعرف كانت عملتلي اختبار الصوت والاداء...ومن يومها وانا عرفت من المحطة دي ان سفروتة عندها موهبة التمثيل والاداء الاذاعي..وبقيت اروح كل يوم احد واربع ..الساعة واحدة الضهر ....ده كان ميعاد التسجيل ...واستمريت لحد قبل الثانوية العامة وبعد كده توقفت...بس ده ميمنعش اني بروح اطل طلة عليهم برضه من وقت للتاني

مبني الاذاعة والتليفزيون بجد عالم غريب اوي ...كنت اشوف الستات وهما بيبوسوا الرجالة عادي جدااااااااااااااااااااا ..والستات العجوزة لابسين كات وجيبات قصيرة اووووووووي ...كمان شوفت فيه اماكن شيك جدااااااااااااااااا واماكن مهجورة او بمعني اصح محدش بيهتم بيها...اتاري بقي الاماكن النضيفة الشيك دي هي اللي بيعدي عليها الريس لما بيكون عنده زيارة للمبني

منساش ابدا اليوم اللي سلمت فيه علي ابلة فضيلة ...كنت موجودة في الاستوديو ساعتها وكنا بنعمل بروفة عشان هنسجل ..وبعدين لقيت ابلة سهير المخرجة بتقولي تاعلي يا نور سلمي علي ابلة فضيلة ...انا اول لما شفتها مصدقتش انها هي كانت عجوزة اووووووووووي مش زي صوتها خالص ....ولقيتها بتقولي قوليلي بقي يا نور انا فعلا شكلي كبير اوي كده غير صوتي؟؟؟ اصل فيه بنوتة قالتلي كده ...انا طبعا معرفتش ارد اقول ايه وابتسمت كده بس الحمد لله ابلة سهير انقذتني وقالتلي يللا يا نور ادخلي راجعي النص مع زمايلك

المحطة التالتة

يوم لما دخلت الجامعة

ـــــــــــــــــــــــــــــــــــــــــــ

بعد اما كنت في مدرسة ثانوي بنات بس ..دخلت الجامعة واصطدمت بالولاد من جديد ...كنت بكلمهم عادي جداااااا وبعاملهم معاملة اخوية بحسن نية ...بس للاسف اتضح ان المعاملة دي متنفعش ..اصل الولد بيفتكر ان خلاص طالما البنت كلمته يبقي هو مفيش زيه وايه بقي يبتدي يتخطي حدود المعاملة ويبان علي حقيقته...انا منكرش ان فيه بعض منهم محترمين جدااااا ومعاملتهم في حدود الزمالة وبس ....بس انا بعدها قررت اني احجم عن معاملة الولاد الافي الحدود الضيقة اوي ...واللي عايز حاجة ياخدها وبعد كده ولا كأنه جه كلمني ...ودي بصراحة اريح معاملة

..........................

طلعت من التلات محطات دول بالاتي

بفضل الله قدرت اثبت نفسي في مدرستي علي مدار العشر سنين اللي قضيتهم فيها وانها كانت هي الاساس في اني ابقي نوران اللي الناس دلوقتي يعرفوهاوبيحبوها جدااااااااااااا

ان الاذاعة ممكن تكون هي العمل البديل للطب ...بس مازلت بقول لن اعيش في جلباب ابي

:))

التأني في معاملة الولاد ...لان صوابعك مش زي بعضها

علي فكرة في محطة رابعة بس لسة وقتها مجاش ...لما يجي ان شاء الله اكيد هتعرفوها كلكم

Saturday, August 9, 2008

عدناااااااا

السلام عليكم جيراني المدونين
اولا: انا بجد مش عارفة اقولكم ايه اليومين اللي غبت فيهم عن التدوين ورجعت بعدها حسيت اني بجد قدام ناس كلمة الشكر دي قليلة عليهم اووووووووووووووووووووووووووووووووووووووووووي...بجد مش عارفة اقولكم ايه..علي قد ما انا معرفش اغلبكم في الحقيقة ..الا اني حسيت اني اعرفكم من زمان..حقيقي انتم حد طيب اوي
الحمد لله انا رجعت احسن بكتير اوي اوي اوي ..يمكن احسن مما كنت قبل كده
ثانيا : سكووووب ..مركز البيوتكنولوجي نزل هنا
يارب يعجبكم...ويكون بالمستوي اللي تتمنوه بعد اما عذبتكم معايا
اسيبكم بقي مع سكوووووب
سلام

Wednesday, August 6, 2008

كلمتين وبس

السلام عليكم
ازيكم جميعا يا جيراني المدونين
انا اسفة اوي علي تأخيري ده بس النت لسة راجع عندي يوم الاتنين
وكنت ناوية اكتب البوست وانزله في سكوووب
بس اعذروني مش هقدرحالتي النفسية سيئة جداااااااااااااااااااااا
ومليش نفس لا ع الكتابة ولا علي اي حاجة خالص
لدرجة انه جات عليا لحظة فكرت اني اقفل المدونتين وخلاص علي كده
بس الحمد لله ان ده محصلش
انا اسفة اوي يا جماعة بجد...عارفة انكم كنتم مستنيين البوست
بس اوعدكم ان شاء الله اول لما افوق كده انزله
مين عارف يمكن ارجع لطبيعتي بكرة
بس بجد عايزاكم تسامحوني وتدعولي
ودكتور عمرو التاج بتاعك هجاوب عليه ان شاء الله ...اول لما ارجع ان شاء الله
هتابع مدوناتكم بس في صمت
لحين اما افوق من حالة الضيق دي
سلام عليكم

Saturday, July 26, 2008

DNA


مش عارفة اقول ايه



قمة الـــ .....مش عارفة



قمة السعادة



قمة الانبساط



قمة الفرح



قمة الاندهاش



مش مصدقة والله



انا النهاردة عزلت الــ



DNA



بأيديااااااااااااااااااااا



اول يوم ليا النهاردة في مركز البيوتكنولوجي



انا اصلا مش عارفة اتلم علي بعضي كده



شفت الحامض النووي بعيني في الابيندورف زي الصورة اللي فوق كده



بس بتاعي كان احلي



:))



______________________________



عارفة انكم بتقولوا مين المجنونة دي



اصبروا بس عليا لحد يوم الخميس وسأوافيكم بكافة التفاصيل







Saturday, July 19, 2008

والله ولبستي التااااج يا سفروتة




منذ زمن ليس بالبعيد...هبط علينا في كوكب السفاريت...تااااااج عتيد...من ساجي الشديد...واخذ التاج في الاهتزاز....وراح وجاء باعتزاز...وراسه والف سيف انه مش هيتجاوب الا بعد الامتحاناز (الامتحانات يعني) ..وكفاية الف ليلة وليلة لحد كده


المهم يا سادة...من كام يوم كمان ...ادبست في تاج تاني شبيه بدرجة كبيرة لتاج ساجي بس ده بقي من الدكتور عمرو فاروق...ومفيش حجج بقي اتحجج بيها تاني


فقررت بامر سفروتي مني انا اني اجاوب ع التاجين دفعة واحدة بعد ضربهم في الخلاط


استعنا ع الشقا بالله


................


اولا: اذكر اسم من دبسك في هذا الواجب


الدكتور مصطفي (ساجي)..... والدكتور عمرو فاروق



ثانيا :اذكر القوانين المتعلقة بهذا الواجب


قوانين ايه بس ....خلي الطابق مستور....مش تبقوا تحطوا قوانين الاول وبعدين تبقوا تسألوا؟؟؟



ثالثا:اذكر ستة اسرار قد لا يكتشفها من يقابلك للمرة الاولي


ستة مرة واحدة؟؟؟؟؟؟؟؟




طب انا هقول اللي بجد متأكدة منهم






رغاااااااااااااااااااية جداااااااا ودي ميعرفهاش الا المقربين قوي

-





داهية مسيحة ده علي حد قولهم ...ولما حبيت استفسر يعني عن معني الكلمة قالولي انهم لما بيشوفوني في الكلية

ميعرفوش اني بيطلع مني الابداع ده كله...وهذا هو معني الداهية المسيحة






مرحة جداااااااااااا بس الناس للوهلة الاولي بيعتقدوا اني مليش في الضحك والنكت والهزار -





رابعا : اذكر 16 صفة عن نفسك ....وساجي كان بيقول 10 صفات



طيب احنا هنضربهم مع بعض ونقسم البلد نصين ونطرح منمهم التلاتة اللي فوق وبكده يتبقي كااااااااااااااام ؟؟؟


احسبوها انتوا بقي





مستمعة جيدة جدااااا..ايون بحب اسمع للي قدامي كويس اوي..ويمكن ده اللي بيخلي ناس كتير جدااا يحكولي مشاكلهم ويفضفضوا معايا وهما مستريحين

...وكمان متأكدين ان كلامهم ده مش هيخرج بره المجال السفروتي بتاعي






عنيدة ودماغي جذمةٌ قديمةٌ ...لما بصمم علي حاجة يبقي لازم تتعمل وبيبقي الموضوع خلاص غير قابل للنقاش...واوقات الموضوع ده بيسببلي مشاكل كتير ...بس يعني بدأت اتخلص من العندية دي شوية بس مازلت برضه عنيدة






اول انطباع من البشر عني اني هادية جداااااا ..بس بعد كده لما باخد عليهم الشعننة بتظهر

-





بموووووووووووت في حاجة اسمها راديو ...بحب اسمع الراديو قوي وبشغله عندي في الاوضة الاربعة وعشرين ساعة حتي وانا نايمة الراديو بيبقي شغال






خجولة حبتين...ومن فترة كده كنت افتكرت اني تخلصت من الخجل ده وبقيت خلاص سفروتة جريئة ...بس رجعت تاني خجولة ...اينعم البنت لازم يكون عندها حياء بس مش الحياء الزيادة عن اللزوم ده






بحب القراية جداااااااااااااااااااااااااا-






غيورة اوي علي اللغة العربية...لدرجة ان الناس ممكن تتخنق مني من كتر ما انا بحب اوي اصلح الاخطاء النحوية او الاملائية-






فاشلة مطبخيا....ايون وبقولها عادي يعني ...مسيرنا نتعلم الطبيخ يعني مش نهاية الكون لو مش بعرف اطبخ لحد دلوقتي.....يعني مفيش مانع اني اعمل مكرونة ...شوية رز..احمر البطاطس حبيبتي...كده يعني






كتومة اوووووي ..وقليلين جدااا اللي يعرفوا مشاكلي او انا مضايقة من ايه...لاني مش بحب اشغل الناس بهمومي وبحس اني بكده بزود عليهم الهموم...والناس مش ناقصة بصراحة






مش بنسي بسرعة ابداااااااااااااا...يعني بفتكر كل حاجة ...واوقات فيه حاجات بفتكرها بتبقي مفرحة وحاجات مؤلمة اوووووي ...عشان كده بحسد الناس اللي بتنسي بسرعة



كسولة شويتين ..ويشهد علي هذا نضارتي حبيبتي ....فضلت قاعدة شهرين من غير نضارة ..ونظري ضعف خالص...بس الحمد لله عملت واحدة جديدة



كفاية عليكم كده عشان انا ذات نفسي تعبت



ولو حد فيكم عارف حاجة تانية عني يقول عشان نبقي ادينا الواجب حقه






خامسا : مرر هذا الواجب الي ستة مدونين




انا مش فاهمة بس ايه حكاية رقم ستة ده معاكم



يمرر هذا التاج من مملكة السفاريت الي الاتي ذكرهم






دكتور بهدووووء





تامر الحسيني





عمرو وجيه





ايمي بيبي





ليكوريكا





bota






وياويله اللي هيفلفص من التاج





وشكرا لسعة صدركم




رئيسة حزب السفاريت

نوران

Saturday, July 12, 2008

سنة واحدة وعملت كده فيا !!!

ياااااااااااااااااااااااااااااااااااااااااااااااااااااااااااااااه



النهاردة بالظبط يكون مرت عليا سنة بالتمام والكمال علي دخولي عالم التدوين




ياااااااه يا عمو بلوجر كتر خيرك انك مستحملني المدة دي كلها




كل سنة وانتي طيبة يا سكووووب وانتي كمان يا حبة صمت




بجد انا مش عارفة اقول ايه ولا اكتب ايه







مش مصدقة اصلا انه يكون مرت سنة بالسرعة دي




دخولي لعالم التدوين كان صدفة بحتة ....قبلها مكنتش اعرف انه في حاجة اصلا اسمها مدونة ولا حتي عمو بلوجر ده




في يوم من ذات الايام كنت بعمل سيرش ع النت بس مش فاكرة عن ايه واذ فجأة الاقيني اتكعبلت في مدونة طرطشة افكار بتاعة سفاح كرموز




استغربت اوي وقلت ايه الناس اللي بيكتبوا اللي علي مزاجهم ده وطنشت خالص وكأن شيئا لم يكن




في يوم تاني من ذات الايام كنت برضه بعمل سيرش ع النت وللاسف لتاني مرة مش فاكرة كان عن ايه قوم ايه بقي اتكعبلت في مدونة الحب جنون بين عيناكي بتاعة السيد اسامة




قلت لأ بقي ما انا لازم اعرف ايه الحكاية وايه الموضوع بالظبط مينفعش كده




لحد اما عرفت ان دي اسمها مدونة وانها موقع مجاني لصاحبها عمو بلوجر




قلت يا حلاوة يا اولاد طب اشمعني انا يعني وهوووووب اخدت تاكسي علطول لعمو بلوجر وعملت سكوووووب مكنتش حتي وقتها عارفة انا ليه سميتها كده


كان مجرد فضول اني اعمل مدونة زي بقية الخلق


ودي كانت بداية حياتي التدوينية


فليسمح لي عمو بلوجر اني اوجه تحية خاصة جدااااااااااااااااااااااااااااا

لكل من


Safa7_Karmooz


&

OSAMA

التدوين دلوقتي بقي شئ اساسي في حياتي .... زي الورقة والقلم بالظبط لما بكون مضايقة بجري عليهم واكتب اللي مضايقني واقطع الورقة بعد كده ...لكن المدونة تفرق عنهم في انه في ناس بيشاركوني اوقاتي العصيبة واوقات فرحي كمان والاقيهم جنبي دايما



عرفت من التدوين شخصيات جميلة اوووووووي بالرغم من اني مش التقيت بيهم في الحقيقة الا اني دايما بحس انهم طيبيبن اوي وبيحبوا الخير للناس وعندهم رسالة في تدويناتهم عايزين يقولوها للناس


الوحيدين اللي اعرفهم في الحقيقة لانهم معايا في الكلية

(مريم (شوشــــــنة روشــــــــنة
وحشاني اوي يا بنت انتي...كل اما تشوف خلقتي تقولي مش ناوية تاخدي كورساااااااااااااااات

هههههههههههههههههههههههههههههههههههههههههههههه

و

(عمرو وجيه (مذكراااات طفل كبيييير

ده بقي نزار قباني الصغير....ماشاء الله موهوب جدااااااااااااااااا...منتظرة ديوانك الاول ان شاء الله....يللا اي خدمة تدبيسة ع الهوا اهيه
:))
...............

في تلات مدونين بعتبرهم اصدقاء المدونة القدامي اللي لما بشوفهم عندي بفرح اوي ...تقريبا يعتبروا اول ناس عرفتهم اوي في التدوين



(1)

اوشن ايز

للاسف مدونة سالي اختفت من الوجود تماما ....كنت بحسها فعلا زي اختي يمكن عشان معنديش اخوات بنات ...بجد سالي طيبة اوي وعفوية كده ...كانت بجد انسانة جميلة اووووووووووووووووي...نفسي ترجعي بقي تاني...وحشتيني اوي يا بنت انتي


(2)

sagi

اول مرة شوفت الكومينت بتاعه عندي كنت تقريبا عايزة اتخانق معاه ..او اني اقبض في زمارة رقبته...بس تقريبا حصل ما يسمي بــ ما محبة الا بعد عداوة...بنبسط اوي لما اشوفه عندي...اصله رغاي ولمض اوي...كتابته ليها اسلوب وطابع غريب ..دايما بتابع بلوجته بس مش بسيب عنده كومينت الا كل فين وفين..بحس اني مش لاقية كلام اقوله علي الروائع اللي بيكتبها.. مش مجاملة علي فكرة يا دوك....كنت علي وشك اني اطلق عليه المكتئب دائما بس دايما بيلحق نفسه في اخر لحظة قبل اما اروح الشهر العقاري واوثق اللقب


:)))



(3)


تامر الحسيني

زي ما بيقولوا ..مسك الختام...حقيقي فضلت ادور علي كلام عشان اقوله في شخصه الجميل ..بس دايما في اللحظات اللي زي دي الواحد بيبقي عاجز عن انه يقول اي حاجة...كل اللي اقدر اقوله..ربنا يوفقك ويحميك




...................




حسيت من كام بوست فاتوا ان جمهور حبة صمت بدأيزيد وبكده اكتسبت ناس جديدة ...حقيقي ناس جميلة جداااااااااااااااا ..بتمني انهم دايما يفتكروا حبة صمت وينوروها علطول...بس مش عايزة اقول اسماء عشان بخاف انسي والناس تزعل مني بقي وتبقي مصيبة كبري...وعمو بلوجر ما يصدق يقوم طاردني من البيت...وانا طبعا مش هسكتله لاني بحبكم اوي اوي اوي اوي اوي




وبحس انكم بجد بيتي التاني




ربنا يخليكم ليا




ويخليني ليكم طبعا... :)))











ايـــــــــــــــــــــــــــــــــــــــــــــــــــــــه ده
براحة يا عيال براحة
كل واحد هياخد من التورتة
ايه اول مرة تشوفوا تورتة؟؟؟؟
.........................
بحبكم كلكم
:)))


ـــــــــــــــــــــــــــــــــــــــــــــــــــــــــــــــ

تحديث بتاريخ 17 يوليو

البنت ايمي صاحبتي الظاهر كده غلطت ودخلت عاااااااااااااالم التدوين

http://smartawy.blogspot.com/

مدونة غلطة مطبعية

ان شاء الله تكون مدونة جامدة جداااااااااااااا

Thursday, July 3, 2008

هو احنا ايه؟؟؟

احم احم
انتباه ايها السادة
بعد الابحاث والدراسات والتحليلات والاستنتاجات السفروتية
وجدنا الاتي
المشكلة : معظمنا كشباب بنعاني من عدم اهتمام الجيل القديم بينا وانهم بيعتبرونا مثال للفشل والاهمال وعدم الاهتمام بما علينا من مسؤوليات ....الخ الخ الخ ، وانه فيه قلة قليلة هي اللي ممكن تحتضنا او تسمعنا وتعترف بينا
السفروتة تعاملت مع قطاع كبير من الشباب سواء بقي في الكلية او في الحياة العامة او الخاصة واستنتجت ايــــــه؟
الاستنتاج : تم تقسيم قطاع الشباب الي ثلاث جهات
اولا : شباب عارف هدفه ايه ..وقدر انه يلاقي المقومات اللي تساعده علي تحقيق الهدف ده... وماشي في طريقه
ثانيا : شباب حاطط هدف قدامه ونفسه يحققه بس مش لاقي المقومات اللي تساعده علي كده وبدأ اليأس يتسرب ليه
ثالثا : شباب محاولش انه يحط هدف في حياته لان من خلال تجارب سابقة شافها قدامه لقي ان الموضوع مش مجزي وانها مش طالبة ولا اهداف ولا احلام وفضل انه ياخدها من قصيرها وميحطش اي هدف قدامه...وسايبها بالبركة
يا تري بقي حضرتك يا اللي معدي هنا
شايف نفسك انهه واحد في التلاتة ولو فيه نوع رابع ...مفيش مشكلة
بس لو انت كنت النوع التالت ليه سايب نفسك كده وليه حطيت اللي فشلوا قدام عينيك ومحاولتش تحط اللي نجحوا قدام عينيك
ياريت الناس متستسهلش الكلام اللي بقوله ده
لانه لو استسهلناه يبقي بجد نستاهل كل اللي بيتقال علينا من الجيل القديم
اعتبروها مجرد دردشة في كوفي شوب يمكن نقدر نوصل لحل
ـــــــــــــــــــــــــــــــــــــــــــــــــــــــــــــــــــــــــــــــــــ
ملحوظة : النهاردة كان عندنا اجتماع مع دكتور وحيد موسي مدير مركز البيوتكنولوجي عندنا في الكلية عشان كنا بنحدد الميعاد بتاع الكورس ،، هو هيتأجل شوية يعني هيبقي يوم 26 بدل يوم 6 عشان معانا طلبة من رابعة وخامسة وهما عندهم تدريب في الوقت الحالي
ادعولي بقي اننا نستفيد اكبر استفادة من الكورس
:)